दक्षिणेतील प्रसिद्ध अभिनेत्री राम्या कृष्णन यांनी सिनेविश्वातील एका काळ्या बाजूवर उघडपणे भाष्य केले आहे. नुकत्याच झालेल्या एका मुलाखतीत त्यांनी चित्रपटसृष्टीतील कास्टिंग काउच आणि कलाकारांचे होणारे शोषण याबद्दल धक्कादायक वक्तव्य केले. त्यांच्या या वक्तव्याची सध्या सर्वत्र चर्चा रंगली आहे. राम्या यांनी बाहुबली चित्रपटात शिवगामी देवीची भूमिका साकारली होती.
शोषण नाकारता येणार नाही
मुलाखतीत राम्या यांना विचारण्यात आले की, सिनेविश्वात खरंच कास्टिंग काउच आहे का? यावर त्यांनी स्पष्ट सांगितले की, इंडस्ट्रीमध्ये कास्टिंग काउच आहे आणि कलाकारांचा वाईट फायदा घेतला जातो. अशा घटना घडत असतात, हे कोणीही नाकारू शकत नाही. यामध्ये कोणताही लिंगभेद नसतो आणि कोणतीच मर्यादा नसते, असेही त्यांनी नमूद केले.
अमेरिकेसारख्या प्रगत राष्ट्रात घडलेल्या एपस्टिन प्रकरणाकडे पाहण्याचा सल्ला त्यांनी दिला. ज्या देशात महिला सर्वांत पुढे आहेत, तिथेही महिलांना वाईट गोष्टींचा सामना करावा लागत आहे. त्यामुळे आपल्याकडे अशा घटना होत नाहीत, असे म्हणता येणार नाही. पूर्वीही अशा घटना घडल्या आहेत आणि पुढेही घडणार आहेत, असे त्या म्हणाल्या.
जबरदस्ती असो वा मर्जीने, हे सुरूच राहणार
ही घटना तुमच्यासोबत कशी घडली आणि तुमच्याकडे हो किंवा नाही म्हणण्याचा पर्याय होता का, यावरही राम्या यांनी भाष्य केले. त्यांच्या मते, वेळेनुसार गोष्टी पूर्णपणे बदलल्या आहेत. मग ती जबरदस्ती असो, स्वतःच्या मर्जीने असो किंवा सामान्य पद्धतीने असो, हे असेच चालत राहणार आहे. याला कोणीही नाकारू शकत नाही.
आपला व्यवसाय ग्लॅमरशी जोडलेला असल्याने लोक याबद्दल बोलतात, पण बाहेर कितीतरी महिला अशा गोष्टींचा सामना करत असतात. हे सर्वत्र घडते आणि यात जेंडरचा काहीही फरक पडत नाही, असेही अभिनेत्रीने स्पष्टपणे सांगितले.
सांगायचे झाल्यास, २००२ मध्ये खडगम हा चित्रपट प्रदर्शित झाला होता. या चित्रपटाचे दिग्दर्शन राम्या यांचे पती आणि दिग्दर्शक कृष्णा वंशी यांनी केले होते. चित्रपटात चित्रपटसृष्टीतील लैंगिक शोषणाच्या मुद्द्यावर भाष्य करण्यात आले होते. या चित्रपटात संगीता यांनी सीतामहालक्ष्मी नावाच्या एका तरुणीची भूमिका साकारली होती, जिची अभिनेत्री बनण्याची इच्छा असते, परंतु तिला असे वाटते की शोषणाला बळी पडण्याशिवाय तिच्यासमोर दुसरा कोणताही पर्याय नाही.
Leave a Reply