माजी क्रिकेटपटू शिखर धवन सध्या पत्नी सोफी शाइनसोबत सुखी वैवाहिक जीवन जगत आहे. हे त्याचे दुसरे लग्न असून पहिल्या लग्नापासून त्याला झोरावर नावाचा मुलगा आहे. नुकत्याच एका मुलाखतीत धवनने मुलाबद्दलच्या भावना व्यक्त करताना सांगितले की, गेल्या चार वर्षांपासून तो मुलाशी बोललेला नाही.
अलीकडेच एका पॉडकास्टमध्ये धवनने गुरुग्राममधील आपले घर दाखवले. या संभाषणादरम्यान त्याने सोफीसोबतच्या पहिल्या भेटीबद्दल, त्यांच्या वैवाहिक प्रवासाबद्दल आणि मुलगा झोरावरबद्दल भाष्य केले. धवनने सांगितले की, सोफीने त्याच्या आयुष्यात महत्त्वपूर्ण बदल घडवून आणले आहेत.
मुलाबद्दल भावूक झाला धवन
मुलाखतीदरम्यान धवन आपल्या मुलाबद्दल भावूक झाला. तो म्हणाला की, तो अजूनही मुलाच्या ब्लॉक केलेल्या क्रमांकावर संदेश पाठवतो. तो एक दिवस आपल्या आयुष्यात परत येईल, हीच तो देवाकडे प्रार्थना करतो. गेल्या चार वर्षांपासून तो मुलाशी बोललेला नाही किंवा त्याच्याशी कोणताही संपर्क ठेवलेला नाही.
सोफीच्या येण्याने आयुष्य बदलले
धवनने सांगितले की, पहिली पत्नी आयेशा मुखर्जीपासून विभक्त झाल्यानंतर त्याने पुन्हा लग्न न करण्याचा निर्णय घेतला होता. त्याने सोफीलाही आपल्या या निर्णयाबद्दल सांगितले होते. धवन आणि सोफीची पहिली भेट दुबईमध्ये काही मित्रांमार्फत झाली. सोफी म्हणाली की, ती पहिल्या भेटीतच धवनच्या प्रेमात पडली. सुरुवातीला भारतात येण्याबद्दल तिच्या मनात शंका होती. पण जेव्हा आयपीएल सुरू झाली आणि धवन देशाबाहेर प्रवास करू शकत नव्हता, तेव्हा सोफीने स्वतःहून भारतात येण्याचा निर्णय घेतला. सोफीला धवनशी लग्न करायचे होते, पण धवन त्यासाठी तयार नव्हता. सोफीने धवनवर लग्न करण्यासाठी कधीही दबाव टाकला नाही. धवन आणि सोफी जवळपास दोन वर्षे एकमेकांना डेट करत होते, त्यानंतर त्यांचा साखरपुडा झाला आणि फेब्रुवारी २०२६ मध्ये त्यांचे लग्न झाले. धवन म्हणाला की, सोफीच्या येण्यानंतर सर्व काही बदलले. त्याच्या आयुष्यात स्थिरता आली आहे, त्याचे रुटीन बदलले आहे आणि तो आता अधिक शिस्तबद्ध झाला आहे.
Leave a Reply