जळगावात यंदा पावसाचे प्रमाण कमी राहिल्याने दुष्काळसदृश परिस्थिती निर्माण झाली आहे. त्याचा फटका आता भाजीपाल्याच्या दरांना बसला असून, शहरातील भाज्या महागल्या आहेत. स्थानिक भागातून होणारी आवक कमी झाल्याने बाजारपेठेत भाज्यांची उपलब्धता घटली आहे. त्यातच वाहतूक खर्च आणि घाऊक बाजारातील वाढलेले दर यामुळे किरकोळ बाजारातही भाजीपाला महागला आहे.
## ग्राहकांचे बजेट कोलमडले
दरवाढीमुळे सर्वसामान्य नागरिकांच्या घरखर्चाचे गणित बिघडले आहे. पूर्वी किलोभर भाजी घेणारे ग्राहक आता अर्धा किलो किंवा पाव किलो भाजी खरेदी करताना दिसत आहेत. शहरातील प्रमुख भाजीबाजारांसह विविध भागांतील भाजीविक्रेत्यांकडे दरवाढीचा परिणाम जाणवत आहे. टोमॅटो, हिरवी मिरची, कोथिंबीर, भेंडी, वांगी, गवार, फ्लॉवर आणि कोबी यांसारख्या भाज्यांच्या दरात वाढ झाल्याने ग्राहकांना अधिक पैसे मोजावे लागत आहेत. रोजच्या जेवणात आवश्यक असणाऱ्या भाज्याही महागल्याने गृहिणींना उपलब्ध बजेटमध्ये स्वयंपाकाचे नियोजन करावे लागत आहे.
## आवक कमी, उत्पादन घटले
यंदा पावसाने अनेक भागांत अपेक्षित साथ न दिल्याने भाजीपाला उत्पादक शेतकऱ्यांना पिके टिकविण्यासाठी पाण्याची व्यवस्था करावी लागली. काही ठिकाणी पाण्याअभावी पिकांची वाढ खुंटली, तर काही ठिकाणी उत्पादनात घट झाली. त्यामुळे बाजारात येणाऱ्या भाजीपाल्याचे प्रमाण कमी झाले आहे. स्थानिक आवक घटल्याने बाहेरील बाजारपेठांवर अवलंबून राहावे लागत असून, त्याचा परिणाम दरांवर होत आहे.
जळगाव कृषी उत्पन्न बाजार समितीसह जिल्ह्यातील बाजारपेठांमध्ये १५ नोव्हेंबरपर्यंतच्या नोंदींमध्ये काही बाजारांतील भाजीपाल्याची आवक कमी झाल्याचे दिसते. जळगाव बाजार समितीत टोमॅटोचा सर्वसाधारण घाऊक दर १४ नोव्हेंबरला प्रतिक्विंटल १२०० रुपये नोंदविण्यात आला होता. मात्र, घाऊक बाजारातील दर आणि किरकोळ विक्रीचे दर वेगवेगळे असतात.
किरकोळ बाजारात कांदे ७० रुपये किलो, बटाटे ३० ते ४० रुपये किलो, लसून ६० ते ७० रुपये पाव, गाजर ४० ते ५० रुपये किलो, मिरची ३० ते ४० रुपये पाव आणि अद्रक ६० ते ७० रुपये पाव या दराने विकले जात आहेत. भाजीपाला विक्रेता गोविंदा वाघ यांनी सांगितले की, आवक कमी होत असल्याने घाऊक बाजारातून भाजीपाला महाग दराने खरेदी करावा लागत आहे आणि वाहतूक खर्चही वाढला आहे. त्यामुळे नाइलाजाने ग्राहकांना वाढीव दराने भाजीपाला विकावा लागत आहे.
Leave a Reply