धाराशिव जिल्ह्यात दुष्काळाची झळ शेतकऱ्यांना बसत असताना पाण्याच्या मुद्द्यावरून राजकीय वातावरण तापले आहे. कृष्णा-मराठवाडा सिंचन योजनेवरून ठाकरे सेनेचे आमदार कैलास पाटील आणि भाजपचे समर्थक आमनेसामने आले आहेत. सिंचन योजनेच्या पाहणीवरून भाजपने तीव्र आक्षेप घेतला आहे.
कैलास पाटील यांनी योजनेच्या कामाची पाहणी केली. त्यानंतर भाजप कार्यकर्ते आक्रमक झाले. उद्धव ठाकरे मुख्यमंत्री असताना या कामासाठी किती वेळा आवाज उठवला, असा सवाल भाजप कार्यकर्त्यांनी केला. एक टीएमसी पाण्याला मोहोळमधून विरोध झाला तेव्हा तुमचे नेते कुठे होते, असाही प्रश्न उपस्थित करण्यात आला. या योजनेवरून धाराशिवमध्ये राजकारण पेटले आहे.
भाजपचा आरोप, ठाकरे सेनेचा पलटवार
भाजपने कैलास पाटील यांच्या पाहणीला जनतेत संभ्रम पसरवण्याचा स्क्रिप्टेड ड्रामा असल्याचा आरोप केला. कृष्णा-मराठवाडा योजनेचे काम पावसाळ्यापूर्वी पूर्ण होणार असल्याचा दावा भाजपने केला आहे. पाहणीच्या निमित्ताने जनतेमध्ये संभ्रम निर्माण करण्याचा प्रयत्न होत असल्याचा आरोपही भाजपने केला आहे. दुसरीकडे ठाकरे सेनेच्या कार्यकर्त्यांनी भाजपला जोरदार प्रतिउत्तर दिले आहे. त्यामुळे धाराशिवमध्ये या योजनेवरून ठाकरे सेना विरुद्ध भाजप असा राजकीय सामना रंगताना दिसत आहे.
रास्ता रोकोपूर्वी पोलिसांच्या नोटिसा
दरम्यान, धाराशिवमध्ये सोलापूर-धुळे महामार्गावरील येडशी टोलनाका येथे आज स्वाभिमानी शेतकरी संघटनेच्या वतीने रास्ता रोको आंदोलन होणार आहे. राजू शेट्टी यांच्या मार्गदर्शनाखाली हे आंदोलन करण्यात येणार आहे. आंदोलनापूर्वीच पोलिस प्रशासनाने खबरदारी म्हणून संघटनेच्या कार्यकर्त्यांना नोटिसा बजावल्या आहेत. कायदा व सुव्यवस्थेचा प्रश्न निर्माण झाल्यास संबंधित कार्यकर्त्यांवर कारवाई केली जाईल, असा इशारा नोटिसांमध्ये देण्यात आला आहे.
Leave a Reply