हिंदी चित्रपटसृष्टीत आपल्या दमदार अभिनयाने वेगळी ओळख निर्माण करणारे सईद जाफरी यांचे नाव आजही आदराने घेतले जाते. चित्रपटांतील भूमिकांबरोबरच त्यांचे वैयक्तिक आयुष्यही नेहमीच चर्चेचा विषय राहिले. पहिल्या पत्नीपासून घटस्फोट घेतल्यानंतर त्यांनी परदेशी महिलेशी दुसरे लग्न केले होते. त्या काळात या निर्णयाची जगभरात चर्चा झाली होती.
रेडिओपासून रंगभूमीपर्यंतचा प्रवास
सईद जाफरी यांचा जन्म ८ जानेवारी १९२९ रोजी पंजाबमधील मलेरकोटला येथे झाला. अभिनयात येण्यापूर्वी ते ऑल इंडिया रेडिओमध्ये इंग्रजी उद्घोषक म्हणून काम करत होते. नंतर अभिनयाकडे वळताना त्यांनी रंगभूमीवर काम सुरू केले आणि युनिटी थिएटर नावाच्या इंग्रजी रंगभूमीची स्थापना केली.
हिंदी आणि हॉलिवूडमधील कारकीर्द
हिंदी चित्रपटांत त्यांनी १९७७ मध्ये ‘शतरंज के खिलाडी’ या चित्रपटातून पदार्पण केले. त्यानंतर ‘चश्मे बद्दूर’, ‘मासूम’, ‘राम तेरी गंगा मैली’, ‘दिल’, ‘हीना’, ‘राम लखन’ आणि ‘आईना’ यांसारख्या चित्रपटांतील भूमिकांमुळे ते घराघरांत पोहोचले. विशेष म्हणजे हॉलिवूडमधील त्यांचे काम हिंदी चित्रपटांपूर्वीच सुरू झाले होते. ‘द गुरु’ (१९६९) हा त्यांचा पहिला हॉलिवूड चित्रपट होता. ‘गांधी’, ‘डेथ ऑन द नाईल’, ‘द मॅन हू वुड बी किंग’ आणि ‘अ पॅसेज टू इंडिया’ यांसारख्या आंतरराष्ट्रीय चित्रपटांतही त्यांनी काम केले.
पहिले लग्न, घटस्फोट आणि दुसरा संसार
अभिनयाच्या क्षेत्रात काम करताना त्यांची ओळख अभिनेत्री आणि लेखिका मधुर (खरे नाव मेहरून्निसा) यांच्याशी झाली. दोघांनी १९५८ मध्ये लग्न केले. त्यांना सकीना, जिया आणि मीरा या तीन मुली झाल्या. मात्र हे नाते फार काळ टिकले नाही. दोघांमधील मतभेद वाढले आणि १९६६ मध्ये त्यांचा घटस्फोट झाला. घटस्फोटानंतर ११ वर्षांनी सईद जाफरी यांनी परदेशी महिला जेनिफर सोरेल यांच्याशी दुसरे लग्न केले. १५ नोव्हेंबर २०१५ रोजी त्यांचे निधन झाले.
Leave a Reply