आगामी चित्रपट ‘महाराष्ट्र एपस्टीन फाईल्स’वरून राज्याच्या राजकारणात आणि मनोरंजन क्षेत्रात नवा वाद निर्माण झाला आहे. राष्ट्रवादी काँग्रेसच्या नेत्या रुपाली चाकणकर यांनी त्यांचे नाव, फोटो आणि वैयक्तिक शैली परवानगीशिवाय वापरल्यास कायदेशीर कारवाई करण्याचा इशारा दिला आहे. त्यामुळे अभिनेत्री दीपाली सय्यद यांच्यासमोरही कायदेशीर अडचणी निर्माण होण्याची शक्यता वर्तवली जात आहे. या वादावर चित्रपटाचे दिग्दर्शक स्वरूप सावंत यांनी आता प्रतिक्रिया दिली आहे.
दिग्दर्शकाचा थेट सवाल
दिग्दर्शक स्वरूप सावंत यांनी रुपाली चाकणकर यांना थेट सवाल केला आहे की, त्यांना या चित्रपटाची भीती का वाटते आणि त्यांनी काही केले आहे का? चित्रपटाच्या सेन्सॉर प्रक्रियेदरम्यान आपल्यावर दबाव आणला जात असल्याचा आरोपही त्यांनी केला आहे.
समाजप्रबोधनासाठी चित्रपट
सावंत यांच्या म्हणण्यानुसार, हा चित्रपट समाजप्रबोधनाच्या उद्देशाने तयार केला जात आहे. भोंदूगिरी आणि महिलांवरील अत्याचारांविरोधात आवाज उठवण्यासाठी हा चित्रपट बनवला जात आहे. हा चित्रपट पाहिल्यानंतर अशा घटना थांबण्यास मदत होईल आणि किमान ७० टक्के गोष्टी थांबतील, असा विश्वास त्यांनी व्यक्त केला. चाकणकर यांनी चित्रपटाच्या वाटेत अडथळे आणण्याऐवजी त्याला पाठिंबा द्यावा, अशी विनंतीही त्यांनी केली आहे. त्या चित्रपटाला विरोध करत असतील तर त्यामागे काही भीती आहे का, त्यांनी बोलावे, असेही ते म्हणाले.
काल्पनिक चित्रपट, ट्रेडमार्कचा प्रश्न नाही
चाकणकर यांनी नाव, फोटो आणि वैयक्तिक शैलीच्या ट्रेडमार्क नोंदणीचा मुद्दा उपस्थित केला आहे. यावर सावंत यांनी चित्रपट काल्पनिक असल्याचे स्पष्ट केले. चित्रपटातील भूमिकेने साडी आणि मंगळसूत्र असा साधा लूक केला आहे. साडी कोणीही नेसू शकते. त्यात कोणताही विशेष लूक तयार केलेला नाही, त्यामुळे ट्रेडमार्कचा प्रश्नच येत नाही, असे त्यांचे म्हणणे आहे.
सेन्सॉर बोर्डावर दबावाचा आरोप
काही तांत्रिक अडचणींमुळे चित्रपट प्रमाणपत्रासाठी सेन्सॉर बोर्डाकडे पाठवण्यास उशीर झाल्याचे सावंत यांनी सांगितले. त्यावेळी बोर्डातील अधिकाऱ्यांनी आपल्याशी रागाने संवाद साधल्याचा दावा त्यांनी केला. ‘आमच्यावर दबाव आहे. रुपाली चाकणकर तीन दिवसांपासून आमच्या कार्यालयात येऊन बसल्या आहेत. त्यांची तुमच्याविरोधात तक्रार आहे,’ असे बोर्डाकडून सांगण्यात आल्याचा दावा सावंत यांनी केला आहे. दरम्यान, या आरोपांवर चाकणकर यांची भूमिका काय असेल आणि चित्रपटाच्या प्रदर्शनाचा मार्ग मोकळा होणार का, याकडे आता सर्वांचे लक्ष लागले आहे.
Leave a Reply