पुण्यात विमानाचे लँडिंग गिअर अडकले, १९२ प्रवासी सुखरूप

पुण्याहून गुवाहाटीकडे जाणाऱ्या इंडिगोच्या विमानाचे उड्डाणानंतर लँडिंग गिअर आत न गेल्याने पुणे विमानतळावर एकच धावपळ उडाली. तांत्रिक बिघाडामुळे विमानाची चाके बाहेरच राहिल्याची माहिती वैमानिकाने हवाई वाहतूक नियंत्रण कक्षाला दिली. त्यामुळे खबरदारीचा उपाय म्हणून पुणे विमानतळावर पूर्ण आणीबाणी घोषित करण्यात आली.

इंडिगोचे ६ई ०६२३ हे विमान पुण्याहून गुवाहाटीकडे जाण्यासाठी रवाना झाले होते. विमानात प्रवासी आणि कर्मचाऱ्यांसह १९२ जण होते. उड्डाणानंतर काही वेळातच विमानाचे लँडिंग गिअर आत न गेल्याचे वैमानिकाच्या लक्षात आले. त्याने तातडीने हवाई वाहतूक नियंत्रण कक्षाला याबाबत माहिती दिली. त्यानंतर पुणे विमानतळ प्रशासन, हवाई वाहतूक नियंत्रण कक्ष, इंडिगो आणि संबंधित यंत्रणांमध्ये समन्वय साधण्यात आला. भारतीय हवाई दलाने पूर्ण आणीबाणी घोषित केली.

धावपट्टीवरून पाहणी केल्यानंतर सुरक्षित लँडिंग

विमान सुरक्षितपणे उतरविण्यापूर्वी लँडिंग गिअरची स्थिती तपासण्यासाठी वैमानिकाने धावपट्टीवरून विमानाची खालून पाहणी करण्याची प्रक्रिया केली. त्यानंतर वैमानिकाने प्रसंगावधान राखत सकाळी ९ वाजून ४ मिनिटांनी विमानाचे पुणे विमानतळावर सुरक्षित लँडिंग केले. विमानातील १९२ प्रवासी आणि कर्मचारी सुखरूप असून, कोणालाही दुखापत झाली नाही.

दरम्यान अग्निशमन दलाची वाहने, रुग्णवाहिका आणि आपत्कालीन यंत्रणा सज्ज ठेवण्यात आली होती. विमानाची स्थिती सामान्य असल्याची खात्री झाल्यानंतर सकाळी ९ वाजून १० मिनिटांनी पूर्ण आणीबाणी मागे घेण्यात आली.

या संपूर्ण प्रक्रियेदरम्यान पुणे विमानतळ प्रशासन, हवाई वाहतूक नियंत्रण कक्ष, इंडिगो आणि भारतीय हवाई दल यांच्यात समन्वय साधण्यात आला. विमानाच्या सुरक्षित लँडिंगसाठी अग्निशमन दल, रुग्णवाहिका आणि आपत्कालीन यंत्रणा सज्ज ठेवण्यात आल्या होत्या. खबरदारीचा उपाय म्हणून करण्यात आलेल्या या तयारीमुळे मोठी दुर्घटना टळली.

प्रवाशांसाठी पर्यायी विमानाची व्यवस्था

लँडिंगनंतर अग्निशमन दलाच्या तीन गाड्या आणि दोन रुग्णवाहिकांच्या मदतीने विमानाला सात क्रमांकाच्या बेपर्यंत नेण्यात आले. त्यानंतर विमानाला एरोब्रिज जोडण्यात आला आणि सर्व प्रवाशांना सुरक्षितपणे खाली उतरविण्यात आले. प्रवाशांचा पुढील प्रवास खोळंबू नये, यासाठी इंडिगोकडून बेंगळुरूहून पर्यायी विमान पुण्यात आणण्याची व्यवस्था करण्यात येत आहे. या विमानातून प्रवाशांना गुवाहाटीला रवाना केले जाणार आहे.