मुंबई, ता. १४ : गिरणी कामगारांना कोन-पनवेल येथील सुमारे १,०८६ घरे देण्याचे आवाहन करण्यात आले होते. मात्र विजेत्यांनी त्याला प्रतिसाद दिला नाही. १,०८६ पैकी केवळ ३५ विजेत्या कामगारांनीच घराचा ताबा घेण्यासाठी अर्ज केला आहे. त्यामुळे या घरांची प्रतीक्षा यादी कार्यान्वित करण्याबाबत विचार सुरू आहे.
२०१६ ची लॉटरी, पण ताबा नाही
म्हाडाच्या मुंबई मंडळाने २०१६ मध्ये कोन-पनवेल येथे गिरणी कामगारांसाठी २,४१७ घरांची लॉटरी काढली होती. मात्र घरे मुंबईपासून दूर असल्याने पायाभूत सुविधांचा अभाव आणि नोकरी-व्यवसाय मुंबईत असल्याने अनेक विजेत्यांनी ताबा घेण्यास टाळाटाळ केली. परिणामी १,०८६ घरे आजही धूळखात पडून आहेत. या घरांच्या देखभालीचा खर्च वाढत असल्याने म्हाडाने ३ नोव्हेंबरपर्यंत अंतिम मुदत देत विजेत्यांना घर घेण्यासाठी अर्ज सादर करण्याचे आवाहन केले होते. मुदतीत अर्ज न केल्यास प्रतीक्षा यादी कार्यान्वित करण्याचा इशाराही दिला होता.
म्हाडासमोर प्रश्न
मात्र मुदत संपल्यानंतरही केवळ ३५ विजेत्यांनीच अर्ज करीत ताबा घेण्याची तयारी दर्शविली आहे. त्यामुळे संबंधित गिरणी कामगारांना राजी कसे करायचे, असा प्रश्न आता म्हाडासमोर उभा राहिला आहे.
Leave a Reply