दिवाळी संपल्यानंतर कामावर परतणाऱ्या चाकरमान्यांचा प्रवास सुरू झाला आहे. थंडीची चाहूल लागल्याने उत्तर आणि दक्षिण भारतात पर्यटनासाठी जाण्याचे नियोजन करणाऱ्यांची संख्याही वाढली आहे. त्यामुळे नाशिक विमानतळावरून उपलब्ध असलेल्या हवाई सेवांना प्रवाशांची मोठी पसंती मिळत आहे. वाढती मागणी पाहून विमान कंपनीने वीकेंडच्या तिकिटांचे दर वाढवले आहेत. त्यामुळे सुटीच्या दिवशी विमानाने प्रवास करणाऱ्या नाशिककरांच्या खिशाला मोठी झळ बसत आहे.
दिल्ली, अहमदाबाद मार्गावर दरवाढ
नाशिक-दिल्ली मार्गावर सकाळी आणि सायंकाळी अशा दोन विमानसेवा उपलब्ध आहेत. या मार्गावरील तिकिटांचे दर ८ हजार ७०० रुपयांवरून १८ हजार रुपयांपर्यंत पोहोचले आहेत. अहमदाबादसाठी वीकेंडचे तिकीट १३ हजार १२४ रुपयांवर गेले आहे. मात्र, सोमवारनंतर, म्हणजेच १६ तारखेनंतर हेच तिकीट ५ ते ७ हजार रुपयांच्या दरम्यान मिळत आहे. हैदराबादसाठी तिकीट ५ हजार ९६२ ते ७ हजार ११७ रुपये आहे, तर बंगळुरूसाठी वीकेंडचे तिकीट ८ हजार ८८९ रुपयांपासून उपलब्ध आहे. नवी दिल्ली, अहमदाबाद आणि बंगळुरू या मार्गांवरील वीकेंडच्या तिकिटांचे दर मोठ्या प्रमाणात वाढले आहेत.
दरम्यान, गुरुवारी, १२ तारखेला अहमदाबादहून नाशिकला येणारे विमान ऐनवेळी रद्द झाले. त्यामुळे त्या विमानातील प्रवाशांना मनस्ताप सहन करावा लागला. वाढलेले तिकीट दर आणि ऐनवेळी रद्द होणारी विमाने यामुळे नाशिककरांच्या हवाई प्रवासाचे गणितच बिघडले आहे.
गोवा सेवा बंद, पर्यटकांची गैरसोय
नाशिक-गोवा मार्गावरील नियमित विमानसेवा २५ ऑक्टोबरपासून बंद झाली आहे. त्यामुळे दिवाळीच्या सुटीत थेट विमानाने गोवा गाठण्याचे नियोजन करणाऱ्या नाशिककरांचा हिरमोड झाला आहे. थेट सेवा बंद झाल्याने पर्यटकांना आता मुंबई गाठून तेथून विमानाने किंवा कोकण रेल्वेने गोव्याला जावे लागत आहे. वाढलेले तिकीट दर, ऐनवेळी रद्द होणारी विमाने आणि बंद झालेली गोवा सेवा या तिन्ही गोष्टींमुळे नाशिककरांचा हवाई प्रवास सध्या अडचणीचा ठरत आहे.
Leave a Reply