बेपत्ता तरुणाचा शेतात मृतदेह, अपघाताचा अंदाज

जळगावात गेल्या चार दिवसांपासून बेपत्ता असलेल्या ३८ वर्षीय तरुणाचा मृतदेह शुक्रवारी शेतात कुजलेल्या अवस्थेत आढळून आला. गलू देविदास कोळी (रा. भोलाणे, ता. जळगाव) असे मृत तरुणाचे नाव आहे. जळगाव-भोलाणे रस्त्यावरील आसोदा शिवारातील एका शेतात हा मृतदेह सापडला. शेतकऱ्याच्या निदर्शनास ही घटना आल्यानंतर त्याने पोलिसांना माहिती दिली.

दुचाकीवरून ओळख पटली

मृतदेहाजवळ असलेल्या दुचाकीवरून मृत व्यक्तीची ओळख पटली. गलू कोळी सोमवारी जळगाव येथे आले होते. त्यानंतर ते घरी परतले नाहीत. कुटुंबीयांनी सर्वत्र शोध घेतला; मात्र ते मिळून न आल्याने रामानंदनगर पोलिस ठाण्यात बेपत्ता झाल्याची तक्रार देण्यात आली होती. त्यानुसार पोलिसांकडून त्यांचा शोध सुरू होता.

शोधादरम्यान पोलिसांनी सीसीटीव्ही फुटेज तपासले. त्यात गलू कोळी यांनी आकाशवाणी चौकात एका व्यक्तीला सोडल्याचे दिसून आले. त्यानंतर ते भोलाणे रस्त्याने जात असल्याचेही फुटेजमध्ये स्पष्ट झाले होते.

अपघाताचा प्राथमिक अंदाज

गलू कोळी हे दुचाकीने घरी परतत असताना रस्त्यावरील वळणावर त्यांचे वाहन शेतात जाऊन पडले असावे आणि या अपघातात त्यांचा मृत्यू झाला असावा, असा प्राथमिक अंदाज पोलिसांनी व्यक्त केला आहे. याप्रकरणी तालुका पोलिस ठाण्यात अकस्मात मृत्यूची नोंद करण्यात आली असून पुढील तपास सुरू आहे.

स्रोत: मूळ बातमी