जुन्नर तालुक्यातील बोरी बुद्रुक येथील ठाकरवाडीजवळील कालवा परिसरात दुचाकीवरून घरी जात असलेल्या नितीन उमाजी जाधव यांच्यावर बिबट्याने हल्ला केला. या हल्ल्यात त्यांच्या पायाला दुखापत झाली असून त्यांना उपचारासाठी नारायणगाव येथील उपजिल्हा रुग्णालयात दाखल करण्यात आले आहे.
महिनाभरात दुचाकीस्वारांवर बिबट्याने हल्ला करण्याची ही तिसरी घटना असल्याने परिसरात भीतीचे वातावरण पसरले आहे. घटनेची माहिती मिळताच वनविभागाच्या कर्मचाऱ्यांनी घटनास्थळी धाव घेतली आणि जखमींना तातडीने रुग्णालयात दाखल करण्यात आले.
ऊसतोड सुरू असल्याने बिबट्यांचा वावर वाढला
बोरी बुद्रुक परिसरात सध्या मोठ्या प्रमाणात ऊसतोड सुरू आहे. त्यामुळे बिबट्यांचा अधिवास विस्कळीत होत असून त्यांचा मानवी वस्तीजवळील वावर वाढत आहे. विशेषतः रात्रीच्या वेळी शेतातून तसेच कालव्यालगतच्या रस्त्यांवरून प्रवास करणाऱ्या दुचाकीस्वारांना बिबट्याचा धोका निर्माण झाला आहे.
विद्यार्थ्यांच्या सुरक्षिततेचा प्रश्न
शिंदेवाडी येथील जिल्हा परिषद शाळेत ठाकरवाडी परिसरातील अनेक विद्यार्थी शिक्षणासाठी ये-जा करतात. याच मार्गावर बिबट्याचा वावर असल्याने विद्यार्थ्यांच्या सुरक्षिततेचा प्रश्न गंभीर बनला आहे. पालकांमध्येही चिंतेचे वातावरण असून विद्यार्थ्यांच्या जीविताला धोका निर्माण होण्यापूर्वी वनविभागाने ठोस उपाययोजना कराव्यात, अशी मागणी होत आहे.
स्रोत: मूळ बातमी
Leave a Reply