नाशिक जिल्ह्यातील दुष्काळाने बाधित झालेल्या चार लाख ४७ हजार ४३ शेतकऱ्यांच्या बँक खात्यात प्रत्येकी पाच हजार रुपयांप्रमाणे एकूण २२३ कोटी ५२ लाख १५ हजार रुपयांची अग्रिम मदत जमा करण्यात आली आहे. दिवाळीच्या काळात ही रक्कम खात्यात आल्याने शेतकऱ्यांना मोठा आधार मिळाला आहे.
पावसाच्या अनियमिततेमुळे दुष्काळी परिस्थिती
राज्यभरात यंदा खरीप हंगामातील पावसाच्या अनियमिततेमुळे दुष्काळी परिस्थिती निर्माण झाली आहे. त्यामुळे बळीराजा अडचणीत सापडला असून, त्यांना दिलासा देण्यासाठी मुख्यमंत्री देवेंद्र फडणवीस यांच्या नेतृत्वाखाली सरकारने १२ प्रकारच्या सवलती आणि उपाययोजना लागू केल्या आहेत. दुष्काळग्रस्त भागातील शेतकरी, शेतमजूर, पशुधन आणि जनतेला दिलासा देण्याचा सरकारचा प्रयत्न आहे. नियमित दुष्काळी मदतीची प्रशासकीय प्रक्रिया पूर्ण होण्यास विलंब होणार असल्याने शेतकऱ्यांना तातडीची मदत म्हणून पाच हजार रुपयांचे अग्रिम अनुदान वितरित करण्यात आले.
तालुकानिहाय लाभार्थी आणि सवलती
मालेगाव तालुक्यात सर्वाधिक ७२,००६ शेतकऱ्यांना मदत मिळाली आहे. बागलाण ५२,४९१, येवला ५१,६३९, निफाड ५५,२४६, सिन्नर ४७,७१०, चांदवड ३८,१२९, नांदगाव ३६,१२१, देवळा २२,६४२, कळवण १९,५८९, सुरगाणा १४,५७७, इगतपुरी १४,४०६, त्र्यंबकेश्वर १२,९७३ आणि पेठ ९,५१४ शेतकऱ्यांना ही मदत मिळाली आहे. दुष्काळ कितीही मोठा असला तरी शेतकऱ्यांनी खचून जाऊ नये; राज्य सरकार शेतकऱ्यांच्या पाठीशी खंबीरपणे उभे आहे, अशी ग्वाही जिल्हाधिकारी आयुष प्रसाद यांनी दिली.
आर्थिक मदत, कर्जविषयक सवलती, पाणीपुरवठा, चारा, रोजगार आणि जलसंधारणाच्या माध्यमातून दुष्काळाचा सामना करण्यासाठी शासन कटिबद्ध असल्याचे त्यांनी सांगितले. शेतकऱ्यांना जमीन महसूल भरण्यापासून सवलत, पीक कर्जांचे पुनर्गठण, कृषी कर्जवसुलीला स्थगिती आणि सक्तीच्या वसुलीला मनाई, कृषिपंपांच्या चालू वीजबिलात सवलत आणि विद्यार्थ्यांच्या परीक्षा शुल्कात माफी या उपाययोजनांचाही समावेश आहे.
स्रोत: मूळ बातमी
Leave a Reply