पहाटेचा गोड गारवा आणि उपस्थितांचा ओसंडून वाहणारा उत्साह, लोकसंगीताच्या तालावर थिरकत आणि गाण्यांवर डोलणारे श्रोते अशा उत्साहपूर्ण वातावरणात सिन्नर येथील नर्मदा लॉन्सच्या हिरवळीवर पाडवा पहाटचा कार्यक्रम उत्तरोत्तर रंगत गेला. श्री सांस्कृतिक मंचतर्फे आयोजित या कार्यक्रमाला आबालवृद्धांसह रसिकांची मोठी गर्दी उसळली होती.
लोकगीते आणि नृत्यकला
लोक कलारंजनचे उदय साटम निर्मित व दिग्दर्शित अस्सल लोकगीते व नृत्यकला सादर करत मराठी संस्कृतीला नमन करण्यात आले. गायक दर्शन साटम, अभिषेक गाडेकर, ब्रह्मानंद पाटणकर, उमा गावड आणि संदेश शिंदे यांनी एकापेक्षा सरस गीतांचे सादरीकरण केले. ‘या विठूचा गजर’, ‘अलीकडे पलीकडे मल्हारवारी’, कोकणातील पारंपरिक गा-हाणे, ‘पिचली माझी बांगडी’ ही गवळण, ‘चांगभलं’, ‘हलगी वाजती’ ही धनगर गीते, ‘अंबाबाई लाड लाड ये’, ‘गार डोंगराची हवा’, ‘सात समंदर आटला ग बाई’, ‘अंबा बाई गोंधळाला ये’, ‘दार उघड बया’, ‘स्वराज्याच तोरण’, ‘राम जी कि निकली सवारी’, ‘भारत का बच्चा जय श्रीराम बोलेगा’ अशा लोकप्रिय लोकगीतांनी उपस्थितांची मने जिंकली.
सावरकर स्तोत्राने सांगता
‘जयोस्तुते श्री महन्मगले’ या स्वातंत्र्यवीर सावरकर रचित देशभक्ती स्तोत्राने कार्यक्रमाची सांगता झाली. सावरकरांच्या वेशभूषेत आलेल्या कलाकाराला श्रोत्यांनी अभिवादन केले. श्री सांस्कृतिक मंचचे विवेक चांडक, विशाल चांडक, प्रमोद चोथवे, मनोज भगत आणि राजेंद्र देशपांडे यांनी स्वागत केले, तर दत्ता चाळके यांनी निवेदन केले.
स्रोत: मूळ बातमी
Leave a Reply