बाराही महिने दिवसरात्र सेवा देणाऱ्या पाणीपुरवठा कर्मचाऱ्यांसोबत सिन्नर येथील नगराध्यक्ष, नगरसेवकांनी दिवाळी साजरी केली. कडवा पाणीपुरवठा योजनेच्या धरणातील पंपिंग स्टेशनवर लक्ष्मीपूजन करण्यात आले. त्याचे नागरिकांकडून कौतुक होत आहे.
तीन केंद्रांवर लक्ष्मीपूजन
कडवा पंपिंग स्टेशनसह कोनांबे जलशुद्धीकरण केंद्र आणि मोहदरी जलशुद्धीकरण केंद्र येथे लक्ष्मीपूजन करण्यात आले. नगराध्यक्ष विठ्ठल उगले, उपनगराध्यक्ष हर्षद देशमुख, गटनेते सागर भाटजिरे, नगरसेवक पंकज जाधव आणि दत्तात्रेय हांडे यांनी विभागातील वॉचमन व जलशुद्धीकरण केंद्र कर्मचाऱ्यांसमवेत ही दिवाळी साजरी केली.
यंदा पाणीपुरवठा सुरळीत
गेल्या तीन वर्षांपासून दसरा आणि दिवाळीसारख्या सणांच्या काळात कडवा पंपिंग स्टेशन येथे तांत्रिक बिघाड होऊन पाणीपुरवठ्यावर विपरीत परिणाम झाला होता. त्यामुळे नागरिकांना गैरसोयीचा सामना करावा लागला होता. परंतु, यंदा पुन्हा हा कटू अनुभव टाळण्यासाठी खबरदारी घेण्यात आली; त्यामुळे सणासुदीच्या काळात सिन्नर शहराचा पाणीपुरवठा नियमित आणि सुरळीत सुरू राहिला. सण आणि आठवड्याच्या सुट्टीच्या दिवसांतही पाणीपुरवठा कर्मचाऱ्यांनी मेहनत घेऊन पाणीपुरवठा सुरळीत ठेवला. त्यांच्या कामाचे कौतुक करून त्यांना प्रोत्साहन देण्यासाठी हा उपक्रम राबविण्यात आला. त्यामुळे कर्मचाऱ्यांनीही लोकप्रतिनिधींचे आभार मानले.
स्रोत: मूळ बातमी
Leave a Reply