मुंबई विद्यापीठाच्या विविध वसतिगृहांमध्ये राहणाऱ्या विद्यार्थ्यांनी दिवाळी मोठ्या उत्साहात साजरी केली. सावित्रीबाई फुले मुलींचे वसतिगृह, पंडिता रमाबाई मुलींचे वसतिगृह, कर्मवीर भाऊराव पाटील मुलांचे वसतिगृह, महर्षी धोंडो केशव कर्वे मुलींचे वसतिगृह, मादाम कामा मुलींचे वसतिगृह, जगन्नाथ शंकरशेठ मुलांचे वसतिगृह आणि नवीन मुलींचे वसतिगृह अशा सात वसतिगृहांतील विद्यार्थी या सणात सहभागी झाले होते.
कुलगुरूंकडून शुभेच्छा आणि फराळ
विद्यापीठाचे कुलगुरू प्रा. रवींद्र कुलकर्णी, प्र. कुलगुरू प्राचार्य डॉ. अजय भामरे आणि कुलसचिव डॉ. प्रसाद कारंडे यांनी वसतिगृहांना भेटी देऊन विद्यार्थ्यांना दिवाळीच्या शुभेच्छा दिल्या. यावेळी त्यांनी विविध वसतिगृहांच्या अधीक्षकांसह विद्यार्थ्यांशी संवाद साधला आणि दिवाळी फराळाचे वितरण केले. ईशान्य भारतासह देशातील विविध राज्यांतून आलेले विद्यार्थी या वसतिगृहांत राहतात.
वसतिगृहात राहणाऱ्या आसाममधील एका विद्यार्थ्याने पारंपरिक पद्धतीने कुलगुरूंचा सत्कार केला. घरापासून दूर असले तरी वसतिगृहात घरची दिवाळी साजरी होत असल्याची भावना विद्यार्थ्यांनी व्यक्त केली.
नवीन वसतिगृह लवकरच
वसतिगृहात राहणाऱ्या विद्यार्थ्यांना सर्वोत्तम शैक्षणिक आणि प्रशासकीय सुविधा पुरवण्यासाठी विद्यापीठ कायमच प्रयत्नशील असल्याचे कुलगुरू प्रा. रवींद्र कुलकर्णी यांनी सांगितले. लवकरच विद्यानगरी संकुलात नवीन वसतिगृह विद्यार्थ्यांसाठी उपलब्ध होणार असल्याची माहितीही त्यांनी दिली.
राष्ट्रीय शैक्षणिक धोरण २०२० मधील विद्यार्थीकेंद्री, पारदर्शक आणि उत्तरदायी प्रशासनाच्या संकल्पनेला अनुसरून ‘एनईपी कनेक्ट’ उपक्रमांतर्गत या कार्यक्रमाचे आयोजन करण्यात आले होते. विद्यार्थ्यांच्या अभिप्रायाच्या आधारे विद्यापीठाच्या प्रशासकीय सेवा अधिक गतिमान, पारदर्शक आणि विद्यार्थीहितैषी करण्याचा प्रयत्न या उपक्रमातून केला जात आहे.
स्रोत: मूळ बातमी
Leave a Reply