पाकिस्तानच्या खैबर पख्तूनख्वा प्रांतात दहशतवाद्यांनी पोलिसांच्या पथकावर भीषण हल्ला केला आहे. अवैध सोने खणनाविरोधातील कारवाईसाठी निघालेल्या पोलिसांच्या गाडीवर डोंगरावरून अंधाधुंद गोळीबार करण्यात आला. या हल्ल्यात डीएसपी आणि उपनिरीक्षकासह तब्बल ११ पोलिसांचा जागीच मृत्यू झाला आहे.
डोंगरावरून अंधाधुंद गोळीबार
पोलिसांचे पथक कोहाट जिल्ह्यातील गुंबट कोहाट परिसरात एका कारवाईसाठी निघाले होते. कोहाट आणि करक जिल्ह्यांच्या सीमेवरील दरबोकाच जालंधर बांदा परिसरात दबा धरून बसलेल्या दहशतवाद्यांनी पोलिसांच्या गाडीवर अचानक गोळीबार केला. या भीषण हल्ल्यात गुंबटचे डीएसपी हैदर जमान आणि उपनिरीक्षक मुख्तियार यांच्यासह ११ पोलिसांचा मृत्यू झाला. हल्लेखोरांनी पोलिसांच्या गाड्यांनाही आग लावली. स्थानिक पोलिसांनी दिलेल्या माहितीनुसार, या हल्ल्यादरम्यान पोलिसांची ५ मोबाईल वाहनेही जाळण्यात आली. यावेळी पोलीस आणि दहशतवाद्यांमध्ये जोरदार चकमक झाली.
राज्यपालांकडून निषेध
घटनेची माहिती मिळाल्यानंतर घटनास्थळी अतिरिक्त पोलीस वाहने पाठवण्यात आली. या हल्ल्याचा सामना करण्यासाठी मोठा पोलीस बंदोबस्तही तैनात करण्यात आला होता. या हल्ल्याचा खैबर पख्तुनख्वाचे राज्यपाल फैसल करीम कुंडी यांनी तीव्र शब्दांत निषेध केला आहे. राज्यपालांनी शहीद पोलिसांना श्रद्धांजली वाहिली आणि त्यांच्या कुटुंबीयांप्रति शोक व्यक्त केला. या घटनेमुळे पाकिस्तानातील सुरक्षा यंत्रणांमध्ये मोठी खळबळ उडाली आहे.
स्रोत: मूळ बातमी
Leave a Reply