कनिका कपूरच्या गाण्यांनी कल्याणकर मंत्रमुग्ध

कल्याणमधील खडकपाडा येथील साई चौकात नुकत्याच पार पडलेल्या दिवाळी पहाट कार्यक्रमात गायिका कनिका कपूर यांच्या हिंदी चित्रपटगीतांनी रसिकांना मंत्रमुग्ध केले. त्यांच्या गाण्यांवर उपस्थितांनी ठेका धरला. यासोबतच कोकणातील पाच तरुणींच्या कोकण कलेक्टिव्ह बँडने मराठी, कोकणी आणि हिंदी गीतांचे सादरीकरण केले. कार्यक्रमाला मोठी गर्दी झाली होती.

कल्याणचा सांस्कृतिक आणि ऐतिहासिक वारसा जपण्याच्या उद्देशाने २०१७ पासून साई चौकात दिवाळी पहाट कार्यक्रमाचे आयोजन केले जाते. यंदा प्रथमच कनिका कपूर आणि कोकण कलेक्टिव्ह बँडने या कार्यक्रमात सादरीकरण केले. माजी केंद्रीय राज्यमंत्री कपिल पाटील यांच्या हस्ते कार्यक्रमाचे उद्घाटन झाले. भाजप आणि कपिल पाटील फाउंडेशनच्या वतीने या कार्यक्रमाचे आयोजन करण्यात आले होते.

प्रेक्षकांमध्ये जाऊन गायन

कनिका कपूर यांनी आपली लोकप्रिय गीते सादर केली. त्यांच्या गाण्यांना उपस्थितांनी उत्स्फूर्त प्रतिसाद दिला. काही गाणी सादर करताना त्या थेट प्रेक्षकांमध्ये जाऊन गायल्या. त्यामुळे कार्यक्रमात उत्साहाचे वातावरण निर्माण झाले. बेबी डॉल या गाण्यामुळे त्या लोकप्रिय झाल्या आहेत.

कोकण कलेक्टिव्ह बँडचे सादरीकरण

कोकण कलेक्टिव्ह बँडच्या पाच तरुणींनी गणेश वंदनेने सादरीकरणाला सुरुवात केली. मराठी, कोकणी आणि हिंदी गीतांच्या सादरीकरणामुळे कार्यक्रमात संगीताचा वेगळा रंग अनुभवायला मिळाला. या वेळी कपिल पाटील यांनी दिवाळी पहाट उपक्रमाला गेल्या आठ वर्षांपासून कल्याणकरांचा प्रतिसाद मिळत असल्याचे सांगितले. ठाणे-भिवंडी-कल्याण मेट्रो प्रकल्पासाठी मुख्यमंत्री देवेंद्र फडणवीस यांनी सकारात्मक प्रतिसाद दिल्याचा उल्लेखही त्यांनी केला. कार्यक्रमाला आगरी कोळी उत्कर्ष मंडळाचे अध्यक्ष तथा माजी नगरसेवक अर्जुन भोईर यांच्यासह विविध क्षेत्रांतील मान्यवर उपस्थित होते.

स्रोत: मूळ बातमी