अंडर-१९ आशिया कप २०२६ स्पर्धेतील अकराव्या सामन्यात भारतीय संघाने यूएईवर ७० धावांनी दणदणीत विजय मिळवला आहे. या विजयासह भारताने उपांत्य फेरीत धडक दिली आहे. पाकिस्तानविरुद्धच्या पराभवामुळे भारतासाठी हा सामना करो या मरो असा होता, मात्र लक्ष्यदीप रायचंदानी यांच्या नेतृत्वाखालील संघाने तो यशस्वीपणे आपल्या नावावर केला.
आर्यवीर सेहवागची वादळी दीडशतकी खेळी
यूएईने टॉस जिंकून क्षेत्ररक्षणाचा निर्णय घेत भारताला फलंदाजीसाठी भाग पाडले. सलामीवीर आर्यवीर सेहवाग याने कर्णधार लक्ष्य रायचंदानी आणि विके विनिथ यांच्यासह जबरदस्त फलंदाजी केली. पहिल्या दोन विकेट्ससाठी झालेल्या भागीदारीमुळेच भारताला ३०० धावांचा टप्पा ओलांडता आला. लक्ष्य आणि आर्यवीर यांनी ८३ चेंडूंमध्ये ६२ धावांची सलामी भागीदारी केली; लक्ष्य ३२ चेंडूत १७ धावा करून बाद झाला.
त्यानंतर आर्यवीरने विनिथसह यूएईच्या गोलंदाजांवर जोरदार हल्ला चढवला. दोघांनी दुसऱ्या विकेटसाठी १८३ चेंडूंमध्ये १९३ धावांची भागीदारी केली. आर्यवीरने मैदानात चौकार-षटकारांचा पाऊस पाडत दीडशतक पूर्ण केले. त्याला द्विशतकाचीही संधी होती, मात्र ती हुकली. नसीम खानच्या चेंडूवर उद्दीश सुरीने त्याचा झेल घेतला. आर्यवीरने १६८ चेंडूंमध्ये १७ चौकार आणि ७ षटकारांसह १६० धावा केल्या. त्याच्यानंतर एकाही भारतीय फलंदाजाला २० धावांचाही टप्पा गाठता आला नाही, मात्र त्याच्या खेळीमुळे भारताला ५० षटकांत ७ विकेट्स गमावून ३०९ धावांपर्यंत पोहोचता आले. यूएईसाठी नसीम खानने सर्वाधिक ४ विकेट्स मिळवल्या, तर तिघांनी प्रत्येकी एक विकेट घेतली.
यूएईचा संघर्ष, भारताचा विजय
३१० धावांच्या आव्हानाचा पाठलाग करताना यूएईने संपूर्ण ५० षटके खेळून काढली, मात्र त्यांना २५० धावांचाही टप्पा गाठता आला नाही. भारताने यूएईला त्यांच्या डावातील शेवटच्या चेंडूवर सर्वबाद केले. यूएईने २३९ धावा केल्या. यूएईसाठी पहिल्या आठपैकी सात फलंदाजांना चांगली सुरुवात मिळाली, मात्र भारतीय गोलंदाजांसमोर फक्त एकाच फलंदाजाला अर्धशतक झळकावता आले. अहमद खुदादाद याने १०० च्या स्ट्राईक रेटने सर्वाधिक ७४ धावा केल्या, तर नुरुल्लाह अयुबी याने ३९ धावांचे योगदान दिले. इतरांना २० धावाही पार करता आल्या नाहीत. भारतासाठी ईशान सूद याने चौघांना बाद केले, तर इतर सहा गोलंदाजांनी प्रत्येकी एक-एक विकेट घेत त्याला चांगली साथ दिली.
स्रोत: मूळ बातमी
Leave a Reply