भारतीय क्रिकेटचा स्टार फलंदाज रिंकू सिंह लवकरच आपल्या आयुष्याची नवीन सुरुवात करणार आहे. येत्या ४ डिसेंबरला रिंकू सिंह समाजवादी पक्षाच्या खासदार प्रिया सरोज यांच्याशी विवाहबंधनात अडकणार आहे. जून २०२५ मध्ये त्यांचा साखरपुडा झाल्यापासूनच क्रिकेटप्रेमी आणि चाहत्यांना या हाय-प्रोफाइल विवाहाची उत्सुकता लागली होती, जी आता लवकरच संपणार आहे.
लखनौमध्ये रंगणार सोहळा
उत्तर प्रदेशची राजधानी असलेल्या लखनौमध्ये रिंकू सिंह आणि खासदार प्रिया सरोज हे विवाहबंधनात अडकणार आहेत. लखनऊमधील प्रसिद्ध ‘हॉटेल रमाडा’ येथे लग्नाचे सर्व विधी आणि सोहळा पार पडणार असल्याचे समजते. या सोहळ्यात क्रीडा, राजकारण आणि चित्रपटसृष्टीतील अनेक दिग्गज हजेरी लावण्याची शक्यता आहे.
समोर आलेल्या माहितीनुसार, अलीगड येथून रिंकू सिंहची लग्नाची वरात लखनौला येणार आहे. या विवाह सोहळ्यात केवळ अतिशय जवळच्या व्यक्तींनाच निमंत्रित करण्यात आले आहे. वरातीत सहभागी होण्यासाठी सुमारे ५० ते ६० खास पाहुण्यांची यादी तयार करण्यात आली आहे, ज्यामध्ये रिंकूचे कुटुंबिय, जवळचे नातेवाईक आणि त्याचे बालपणीचे काही मित्र यांचा प्रामुख्याने समावेश असण्याची शक्यता आहे.
तयारी जोरात; दिग्गजांची हजेरी अपेक्षित
सध्या दोघांच्या घरी लग्नाची खरेदी आणि तयारीची गडबड सुरू आहे. रिंकू सिंह यांच्या आईने आपली होणारी सून खासदार प्रिया सरोज यांच्यासाठी अत्यंत सुंदर आणि खास ‘पिवळ्या रंगाची साडी’ खरेदी केली असल्याचे म्हटले जात आहे.
लखनऊमध्ये रंगणाऱ्या या हाय-प्रोफाइल विवाह सोहळ्याला देश-विदेशातील अनेक दिग्गज आणि व्हीव्हीआयपी हजेरी लावणार आहेत. बॉलिवूडचा किंग खान आणि कोलकाता नाइट रायडर्सचा मालक शाहरुख खान, मुख्य प्रशिक्षक गौतम गंभीर, रोहित शर्मा आणि विराट कोहली, बीसीसीआयचे उपाध्यक्ष राजीव शुकला हे उपस्थित राहणार असल्याचे म्हटले जात आहे.
लखनऊ येथील रमाडा हॉटेलमध्ये लग्नाचे सर्व विधी आणि सोहळा पार पडल्यानंतर, रिंकू सिंहचे मूळ ठिकाण असलेल्या अलिगडमध्ये एका भव्य सोहळ्याचे आयोजन करण्यात आले आहे. टी-२० फॉरमॅटमध्ये रिंकू सिंह भारताचा आक्रमक फलंदाज म्हणून ओळखला जातो.
स्रोत: मूळ बातमी
Leave a Reply