भारत-न्यूझीलंड तिसरा वनडे: पावसामुळे नाणेफेक लांबली

भारत आणि न्यूझीलंड यांच्यातील तिसऱ्या एकदिवसीय सामन्यावर पुन्हा एकदा पावसाचे सावट निर्माण झाले आहे. हॅमिल्टनमध्ये पावसाचे आगमन झाल्याने खेळपट्टी पुन्हा एकदा कव्हर्सने झाकण्यात आली आहे. त्यामुळे नाणेफेक आणि सामना सुरू होण्यास आणखी विलंब होण्याची शक्यता आहे. आधीच मालिकेतील पहिल्या दोन सामन्यांमध्ये पावसाने व्यत्यय आणला होता. आता तिसऱ्या सामन्यातही पावसाचा खेळ सुरू झाल्याने क्रिकेट चाहत्यांची निराशा होण्याची शक्यता आहे.

भारत आणि न्यूझीलंड यांच्यातील पाच सामन्यांच्या एकदिवसीय मालिकेत भारतीय संघाने दमदार कामगिरी केली आहे. पहिल्या आणि दुसऱ्या सामन्यात पावसामुळे डकवर्थ-लुईस-स्टर्न पद्धतीचा वापर करावा लागला होता. मात्र, दोन्ही सामन्यांत भारताने विजय मिळवत मालिकेत २-० अशी आघाडी घेतली आहे. त्यामुळे तिसरा सामना जिंकून मालिका खिशात घालण्याची संधी टीम इंडियाकडे आहे.

हॅमिल्टनमध्ये पावसाचा खेळ सुरूच

तिसऱ्या एकदिवसीय सामन्यापूर्वी हॅमिल्टनमधील हवामान स्वच्छ राहील आणि चाहत्यांना पूर्ण सामना पाहायला मिळेल, अशी अपेक्षा होती. मात्र, हवामानाच्या अंदाजाने या अपेक्षांवर पाणी फेरले आहे. हवामान खात्याच्या अंदाजानुसार, मंगळवारी दुपारी हॅमिल्टनमध्ये पावसाची ९६ टक्के शक्यता असून तापमान १८ अंश सेल्सिअसच्या आसपास राहण्याचा अंदाज आहे. सकाळी पावसाची शक्यता १०० टक्के, तर रात्री ९० टक्के वर्तवण्यात आली आहे. सामना स्थानिक वेळेनुसार दुपारी ३ वाजता सुरू होणार आहे. मात्र, सामन्याच्या निर्धारित वेळेतही पावसाचा धोका कायम आहे.

सामन्यादरम्यान पावसाची शक्यता अशी आहे: दुपारी ३ वाजता ७३ टक्के, दुपारी ४ वाजता ८० टक्के, दुपारी ५ वाजता ८० टक्के, संध्याकाळी ६ वाजता ८० टक्के, संध्याकाळी ७ वाजता ८० टक्के, रात्री ८ वाजता ४९ टक्के, रात्री ९ वाजता ७० टक्के, रात्री १० वाजता ७६ टक्के आणि रात्री ११ वाजता ६७ टक्के. या अंदाजामुळे तिसरा सामना पूर्ण होण्याबाबत अनिश्चितता निर्माण झाली आहे. पावसाचा जोर कायम राहिल्यास सामना लांबणीवर पडू शकतो. इतकेच नव्हे, तर एकही चेंडू न टाकता सामना रद्द होण्याची शक्यताही नाकारता येत नाही.

नाणेफेकीची वेळ बदलली; खेळपट्टीचा फायदा वेगवान गोलंदाजांना?

दरम्यान, भारतीय क्रिकेट नियामक मंडळाने दिलेल्या ताज्या माहितीनुसार, पाऊस थांबला असून खेळपट्टीवरील कव्हर्स काढण्यात आले आहेत. नाणेफेक स्थानिक वेळेनुसार दुपारी ३.०२ वाजता, म्हणजेच भारतीय वेळेनुसार सकाळी ७.३२ वाजता होणार आहे, तर खेळाला स्थानिक वेळेनुसार दुपारी ३.३० वाजता, म्हणजेच भारतीय वेळेनुसार सकाळी ८ वाजता सुरुवात होणार आहे.

पावसामुळे खेळपट्टी दीर्घकाळ कव्हर्सखाली ठेवल्यास तिच्या पृष्ठभागावर ओलावा टिकून राहू शकतो. सूर्यप्रकाश आणि हवेचा संपर्क कमी झाल्यामुळे खेळपट्टी लवकर कोरडी होण्याची शक्यता कमी असते. अशा परिस्थितीत खेळपट्टीचा पृष्ठभाग काहीसा मऊ आणि दमट राहू शकतो. याचा फायदा प्रामुख्याने वेगवान गोलंदाजांना मिळण्याची शक्यता आहे. चेंडू खेळपट्टीवर पडल्यानंतर सीम मूव्हमेंट मिळू शकते. त्यामुळे फलंदाजांसाठी सुरुवातीच्या षटकांमध्ये धावा काढणे आव्हानात्मक ठरू शकते. मात्र, प्रत्यक्ष परिस्थिती खेळ सुरू होण्याच्या वेळीच स्पष्ट होईल.

स्रोत: मूळ बातमी