धुळे शहरातील बीएपीएस स्वामिनारायण मंदिरात सोमवारी दीपोत्सव आणि महाआरतीचा सोहळा भक्तिमय वातावरणात पार पडला. या सोहळ्यासाठी मंदिर परिसरात तब्बल तीन हजार दिवे प्रज्वलित करण्यात आले होते. दिव्यांच्या तेजोमय प्रकाशाने संपूर्ण मंदिर परिसर उजळून निघाला होता. महाआरती संत आनंदजीवन स्वामी यांच्या हस्ते झाली. यावेळी अक्षर पुरुषोत्तम महाराज आणि गुणातीत गुरुपरंपरेची भावपूर्ण आरती करण्यात आली.
सुरत अक्षरधामची हुबेहूब रांगोळी
दीपोत्सवाचे मुख्य आकर्षण म्हणजे बालिका व युवती मंडळाने परिश्रमपूर्वक साकारलेली सुरत अक्षरधाम मंदिराची हुबेहूब रांगोळी. या आकर्षक रांगोळीने उपस्थित भाविकांचे लक्ष वेधून घेतले. नेत्रदीपक सोहळा डोळ्यात साठवण्यासाठी भाविकांनी मंदिरात गर्दी केली होती.
आंतरिक प्रगतीचा संदेश
संत आनंदजीवन स्वामी यांनी उपस्थित भाविकांना दिवाळीच्या मंगलमय शुभेच्छा दिल्या. वर्षानुवर्षे जपली जाणारी ही दीपोत्सव परंपरा केवळ बाह्य प्रकाशाची नाही, तर अंतर्मन प्रकाशित करून आंतरिक प्रगती साधण्याचा संदेश देते, असे त्यांनी यावेळी स्पष्ट केले.
स्रोत: मूळ बातमी
Leave a Reply