सिंधुदुर्ग जिल्ह्यातील इन्सुली परिसरात गेल्या काही दिवसांपासून वावर असलेल्या ओंकार हत्तीने शनिवारी, ७ नोव्हेंबर रोजी रात्री क्षेत्रफळवाडी परिसरात धुडगूस घातला. हत्तीने दोन दुचाकी, एक चारचाकी वाहन आणि घराच्या संरक्षक भिंतीच्या गेटची नासधूस केली. याशिवाय शेतात रचून ठेवलेल्या भाताच्या उडव्यांचेही नुकसान झाले. या घटनेमुळे गावात भीतीचे वातावरण पसरले आहे.
वाहने आणि घराचे नुकसान
शनिवारी रात्री हत्तीने गावातील रमेश सीताराम तळवडेकर यांच्या दोन दुचाकींचे नुकसान केले, तर यशवंत चंद्रकांत परब यांच्या एका दुचाकीसह चारचाकी वाहनाचेही नुकसान झाले. सुनील जावडेकर यांच्या घराच्या संरक्षक भिंतीच्या गेटचे नुकसान झाले असून शेतकरी रवींद्र वसंत राणे यांनी रचून ठेवलेल्या भाताच्या उडव्यांची नासधूस करण्यात आली. लोकवस्तीत येऊन हत्ती घरालगत उभ्या केलेल्या वाहनांचे नुकसान करीत असल्याने ग्रामस्थ चिंतेत आहेत.
वनविभागाकडे उपाययोजनांची मागणी
सध्या ओंकार हत्तीचा वावर इन्सुली, वाफोली, विलवडे, कोनशी, ओटवणे आणि भालावल परिसरात असल्याचे ग्रामस्थांकडून सांगण्यात येत आहे. वनविभागाने या परिस्थितीची गांभीर्याने दखल घेऊन हत्तीच्या हालचालींवर लक्ष ठेवावे, रात्रीच्या वेळी गस्त वाढवावी आणि ग्रामस्थांच्या सुरक्षिततेसाठी तातडीने प्रभावी उपाययोजना कराव्यात, अशी मागणी लोकांकडून केली जात आहे.
स्रोत: मूळ बातमी
Leave a Reply