नामपूर शहरातील विविध भागांतून ग्रामपंचायतीच्या घंटागाडीच्या माध्यमातून संकलित करण्यात येणारा कचरा मोसम नदीकाठावरील मटण मार्केट परिसरात टाकला जात असल्याने परिसरातील नागरिकांना दुर्गंधीचा त्रास सहन करावा लागत आहे. कचऱ्याचे ढीग साचल्याने नागरिकांच्या आरोग्याचा प्रश्न ऐरणीवर आला आहे.
डंपिंग ग्राउंड असतानाही कचरा नागरी वस्तीत
विशेष म्हणजे मोराणे रस्त्यालगत तालुका क्रीडा संकुलाच्या शेजारी ग्रामपंचायतीच्या गावठाण हद्दीत कचरा टाकण्यासाठी डंपिंग ग्राउंड अनेक वर्षांपासून उपलब्ध आहे. असे असतानाही शहरातील कचरा मटण मार्केट परिसरात टाकला जात आहे. डंपिंग ग्राउंडचा वापर टाळून पर्यायी ठिकाणी कचरा का टाकला जातो, याचे ग्रामस्थांना कोडे पडले आहे. शहराचा विस्तार वाढत असताना दैनंदिन कचऱ्याचे संकलन आणि त्याची शास्त्रोक्त विल्हेवाट लावणे ही ग्रामपंचायतीसमोरील महत्त्वाची जबाबदारी आहे.
वर्गीकरण आणि नियोजनबद्ध विल्हेवाटीची गरज
शहरातील विविध भागांतून घंटागाडीद्वारे ओला व सुका कचरा संकलित केला जातो. मात्र हा कचरा मटण मार्केट परिसरात टाकला जात असल्याने परिसरात कचऱ्याचे ढीग साचत आहेत. त्यातून पसरणाऱ्या दुर्गंधीमुळे स्थानिक रहिवासी, व्यावसायिक आणि परिसरातून ये-जा करणाऱ्या नागरिकांना मोठा मनस्ताप सहन करावा लागत आहे. पावसाळ्यानंतरही अशा ठिकाणी कचरा साचून राहिला आहे. केवळ घंटागाडीने कचरा गोळा करणे पुरेसे नसून त्याचे योग्य वर्गीकरण आणि नियोजनबद्ध विल्हेवाट लावणे आवश्यक आहे.
या प्रकाराबाबत आनंद, क्रांती मंडळाच्या पदाधिकाऱ्यांनी तीव्र नाराजी व्यक्त केली आहे. सामाजिक कार्यकर्ते राकेश सावंत यांनी ग्रामपंचायत प्रशासनाने तातडीने मटण मार्केट परिसरातील कचरा हटवून स्वच्छता करावी आणि नागरी वस्तीच्या परिसरात कचरा टाकला जाणार नाही याची दक्षता घ्यावी, अशी मागणी केली आहे. प्रशासनाने याकडे दुर्लक्ष केल्यास आंदोलनात्मक पवित्रा स्वीकारण्यात येईल, असा इशाराही त्यांनी दिला आहे.
स्रोत: मूळ बातमी
Leave a Reply