व्यायामात जास्त घाम आला म्हणजे वजन कमी होतं का?

वजन कमी करण्यासाठी अनेकजण दररोज व्यायाम करतात. चालणे, धावणे, झुंबा, दोरीच्या उड्या अशा वेगवेगळ्या प्रकारच्या व्यायामांचा त्यात समावेश असतो. व्यायाम करताना शरीरातून मोठ्या प्रमाणात घाम बाहेर पडतो. त्यामुळे जितका जास्त घाम गाळू, तितके जास्त वजन कमी होईल, असे अनेकांना वाटते. काहीजण तर घाम येत नसेल, तर व्यायामाचा पुरेसा फायदा होत नाही, असा समज करून घेतात. मात्र जास्त घाम आल्याने शरीरातील चरबी खरंच कमी होते का, याबाबत अनेकांच्या मनात संभ्रम असतो.

घाम येणे म्हणजे चरबी कमी होणे नव्हे

व्यायाम करताना शरीराची हालचाल वाढते आणि त्यामुळे शरीराचे तापमानही वाढू लागते. वाढलेले तापमान नियंत्रित ठेवण्यासाठी शरीर घामाच्या स्वरूपात पाणी बाहेर टाकते. ही शरीराची नैसर्गिक प्रक्रिया आहे. घामामुळे शरीरातील पाण्याचे प्रमाण कमी होते. त्यामुळेच व्यायामानंतर वजनकाट्यावर वजन थोडे कमी दिसू शकते. मात्र हे वजन कमी होणे म्हणजे शरीरातील चरबी कमी झाली असे नाही. पाणी प्यायल्यानंतर हे वजन पुन्हा वाढू शकते.

वजन कमी करण्यासाठी खरंच काय महत्त्वाचे?

वजन कमी करण्यासाठी शरीरातील कॅलरीज बर्न होणे महत्त्वाचे आहे. चालणे, धावणे, सायकलिंग, झुंबा, पोहणे आणि दोरीच्या उड्या यांसारख्या व्यायामांमुळे कॅलरीज बर्न होण्यास मदत होते. यासोबतच संतुलित आहार घेणेही तितकेच गरजेचे आहे. आहारातून मिळणाऱ्या कॅलरीजपेक्षा शरीराने बर्न केलेल्या कॅलरीजचे प्रमाण अधिक असेल, तर हळूहळू वजन कमी होण्यास मदत होते.

प्रत्येक व्यक्तीच्या शरीराची रचना वेगळी असते. त्यामुळे काही लोकांना अगदी थोडा व्यायाम केला तरी भरपूर घाम येतो, तर काहींना तासभर व्यायाम करूनही कमी घाम येतो. याचा अर्थ कमी घाम येणाऱ्या व्यक्तीला व्यायामाचा फायदा होत नाही, असा नाही. व्यायामाची तीव्रता, वातावरणातील तापमान, आर्द्रता आणि शरीराची नैसर्गिक रचना यांवर घामाचे प्रमाण अवलंबून असते. त्यामुळे कमी घाम आला तरी वजन कमी होऊ शकते.

वजन कमी करण्यासाठी मुद्दाम जास्त घाम काढण्याचा प्रयत्न करू नये. उन्हात व्यायाम करणे, जाड कपडे घालणे किंवा सॉना बेल्ट वापरणे टाळावे. अतिप्रमाणात घाम आल्यास शरीरातील पाणी आणि क्षार कमी होऊ शकतात. त्यामुळे चक्कर येणे, अशक्तपणा, डोकेदुखी आणि थकवा जाणवू शकतो. त्यामुळे वजन कमी करण्यासाठी घामाच्या प्रमाणाकडे लक्ष देण्यापेक्षा नियमित व्यायाम, योग्य आहार, पुरेशी झोप आणि शरीराला आवश्यक तेवढे पाणी देणे महत्त्वाचे आहे. घाम किती आला यापेक्षा शरीरातील चरबी किती कमी झाली, हे वजन कमी करण्यासाठी अधिक महत्त्वाचे आहे.

स्रोत: मूळ बातमी