धुळे शहरात आगामी काळात पाणीटंचाई निर्माण होण्याची शक्यता लक्षात घेऊन पांझरा नदीवरील केटी वेअर बंधाऱ्यांमध्ये लोखंडी पाट्या बसवून पाणी अडविण्यात यावे, अशी मागणी संभाजी ब्रिगेडने आमदार अनुप अग्रवाल यांच्याकडे केली आहे. अल्प पावसामुळे ही मागणी करण्यात आली आहे.
संभाजी ब्रिगेडने लघु पाटबंधारे विभागाच्या कार्यकारी अभियंत्यांना दिलेल्या निवेदनाची प्रत आमदार अग्रवाल यांना देण्यात आली. जिल्हाध्यक्ष हेमंत भडक यांच्या नेतृत्वाखाली पदाधिकाऱ्यांनी आमदारांशी या विषयावर चर्चा केली. पांझरा नदीवरील सिंधी कॉलनीजवळ तसेच प्रभातनगर परिसरातील केटी वेअर बंधाऱ्यांमध्ये लोखंडी पाट्या बसविण्याची आवश्यकता पदाधिकाऱ्यांनी निदर्शनास आणून दिली.
## भूजलपातळी वाढण्याची अपेक्षा
बंधाऱ्यांमध्ये पाट्या नसल्यामुळे नदीपात्रातील पाणी वाहून जात आहे. या ठिकाणी पाट्या बसवून पाणी अडविल्यास त्याचा साठा वाढण्यासह धुळे शहरातील भूजलपातळी वाढण्यास आणि परिसरातील पाणी उपलब्धतेस मदत होऊ शकते, अशी भूमिका पदाधिकाऱ्यांनी मांडली.
चर्चेदरम्यान आमदार अग्रवाल यांनी आगामी काळात पांझरा नदीला पाण्याचे आवर्तन सोडण्यात येईल, त्यावेळी संबंधित केटी वेअर बंधाऱ्यांवर लोखंडी पाट्या बसवून पाणी अडविण्याची कार्यवाही करण्यात येईल, असे आश्वासन दिल्याचे संभाजी ब्रिगेडने म्हटले आहे.
## आंदोलन तूर्त स्थगित
नदीतील पाणी अडविण्याच्या मागणीबाबत आमदारांनी सकारात्मक भूमिका दर्शविल्याने संभाजी ब्रिगेडने तूर्त आंदोलन स्थगित करण्याचा निर्णय घेतला. दरम्यान, नदीला आवर्तन सोडताना बंधाऱ्यांवर लोखंडी पाट्या बसविण्यात आल्या नाहीत तर पुन्हा आंदोलन तीव्र करण्यात येईल, असा स्पष्ट इशारा पदाधिकाऱ्यांनी दिला.
दरम्यान, धुळे शहरातील सावरकर पुतळ्यासमोरील अंजनशा दाता सरकार परिसरातील पुलाचे काम नव्याने करण्यात येणार असून, या पुलाची उंचीही वाढविण्यात येणार असल्याची माहिती आमदार अग्रवाल यांनी दिली. या पुलाच्या ठिकाणीही संभाजी ब्रिगेडच्या मागणीनुसार पाट्या बसवून पाणी अडविण्याचे नियोजन करण्यात येईल, असे त्यांनी चर्चेदरम्यान स्पष्ट केले. या भेटीप्रसंगी जिल्हाध्यक्ष भडक, जिल्हा सचिव महेश पाटील, अमर फरताडे, गोकुळ देवरे, धनंजय गाळणकर आदी उपस्थित होते.
स्रोत: मूळ बातमी
Leave a Reply