दिवाळीच्या पार्श्वभूमीवर नाशिक शहरात इलेक्ट्रॉनिक्स आणि होम अप्लायन्स वस्तूंच्या खरेदीला चांगली चालना मिळत आहे. नवीन वस्तूंची खरेदी, जुन्या उपकरणांची अदलाबदल आणि घराला आधुनिक स्वरूप देण्याच्या उद्देशाने नागरिक टीव्ही, फ्रिज, वॉशिंग मशीन, डिश वॉशर, एअर कंडिशनर, मायक्रोवेव्ह ओव्हन, मिक्सर आणि व्हॅक्यूम क्लीनर यांसारख्या वस्तूंना पसंती देत आहेत.
ग्राहकांना आकर्षित करण्यासाठी विक्रेत्यांकडून विविध सवलती, एक्स्चेंज ऑफर्स, कॅशबॅक आणि नो-कॉस्ट ईएमआयच्या सुविधा उपलब्ध करून देण्यात आल्या आहेत. शॉपिंग मॉल्स, कॉलेज रोड, गंगापूर रोड, सिडको, नाशिक रोड आणि उपनगरांतील इलेक्ट्रॉनिक्स शोरूममध्ये ग्राहकांची वर्दळ वाढली आहे. दिवाळीच्या मुहूर्तावर नवीन वस्तू घरी आणण्याची परंपरा असल्याने अनेक कुटुंबे खरेदीसाठी शोरूममध्ये दाखल होत आहेत.
मोठ्या स्क्रीनच्या स्मार्ट टीव्हीला पसंती
यंदाच्या खरेदीमध्ये मोठ्या स्क्रीनचे स्मार्ट टीव्ही ग्राहकांचे लक्ष वेधून घेत आहेत. ४३, ५५ आणि ६५ इंच स्क्रीनच्या टीव्हीबरोबर फोर-के डिस्प्ले, स्मार्ट कनेक्टिव्हिटी आणि उत्कृष्ट साउंड क्वालिटी असलेल्या मॉडेल्सची ग्राहकांकडून चौकशी होत आहे. मनोरंजनाच्या बदलत्या आवडीनिवडी लक्षात घेता ग्राहक आधुनिक तंत्रज्ञानाच्या उपकरणांकडे वळत आहेत.
ऊर्जा बचत करणारे इन्व्हर्टर फ्रिज, मोठ्या क्षमतेचे डबल डोअर फ्रिज, फ्रॉस्ट फ्री मॉडेल्स तसेच फुली ऑटोमॅटिक वॉशिंग मशीनलाही ग्राहक पसंती देत आहेत. जुन्या उपकरणांच्या बदल्यात नवीन वस्तू घेण्यासाठी एक्स्चेंज ऑफर्सचा लाभ घेतला जात आहे.
व्यवसायाला नवी ऊर्जा
पारंपरिक उपकरणांबरोबर एअर फ्रायर, रोबोटिक व्हॅक्यूम क्लिनर, वॉटर प्युरिफायर आणि स्मार्ट होम उपकरणांविषयी ग्राहकांमध्ये उत्सुकता दिसत आहे. कमी वेळेत घरातील कामे पूर्ण करण्यासाठी आधुनिक उपकरणांचा वापर वाढत आहे. औद्योगिक वसाहतीमध्ये कामगारांना मिळालेला दिवाळी बोनस, वेतन आणि सणासुदीच्या सवलतींमुळे बाजारपेठेतील खरेदीला हातभार लागत आहे. ग्राहकांकडून प्रत्यक्ष शोरूममध्ये वस्तू पाहून, त्यांच्या वैशिष्ट्यांची तुलना करून खरेदी करण्याला प्राधान्य दिले जात आहे.
स्रोत: मूळ बातमी
Leave a Reply