दिवाळीच्या पार्श्वभूमीवर रविवारी लक्ष्मीपूजनासाठी फुलांच्या मागणीत प्रचंड वाढ झाली. त्यामुळे गुलटेकडी मार्केट यार्डातील फूलबाजारात सर्व प्रकारच्या फुलांचे दर १० ते २० टक्क्यांनी वधारले आहेत. राज्यातील दुष्काळी परिस्थितीमुळे यंदा फुलांचे उत्पादन घटले असून, गेल्या आठवड्यात झालेल्या पावसामुळे फुलांचे मोठ्या प्रमाणात नुकसान झाले आहे.
बाजारात दाखल होणाऱ्या फुलांमध्ये खराब आणि कमी दर्जाच्या फुलांचे प्रमाण अधिक असून, चांगल्या प्रतीच्या फुलांची उपलब्धता मर्यादित आहे. सणासुदीत धार्मिक कार्यक्रम, पूजाविधी, घरगुती सजावट आणि शुभकार्यांसाठी फुलांचा मोठ्या प्रमाणात वापर होतो. त्यामुळे पारंपरिक फुलांसह सजावटीच्या फुलांनाही मागणी वाढली आहे. झेंडू, शेवंती, गुलाब आणि गुलछडी या फुलांना विशेष मागणी आहे. त्याचबरोबर डच गुलाब, जर्बेरा, कार्नेशन, ऑर्चिड आणि लिलियम यांसारख्या सजावटीच्या फुलांचे दरही वाढले आहेत.
भाऊबिजेपर्यंत मागणी कायम राहण्याची शक्यता
फूलबाजारात सध्या फुलांची आवक नेहमीप्रमाणे होत आहे. मात्र सणासुदीच्या काळात मागणी वाढल्यामुळे फुलांना उठाव आहे. मागणीच्या तुलनेत आवकेत विशेष वाढ नसल्याने दरात तेजी निर्माण झाली आहे. अखिल फूलबाजार आडते असोसिएशनच्या पदाधिकाऱ्यांनी सांगितले की, घाऊक दरात १० ते २० टक्क्यांनी वाढ झाली असून भाऊबिजेपर्यंत ही मागणी कायम राहण्याची शक्यता आहे.
फुलांचे घाऊक दर
पारंपरिक फुलांमध्ये झेंडू ५० ते १०० रुपये, गुलछडी १२० ते १८० रुपये, शेवंती ५० ते २०० रुपये आणि गुलाब ३० ते ५० रुपये गड्डी दराने विकले जात आहेत. जुई आणि चमेली ८०० ते १२०० रुपये, डच गुलाब १२० ते २०० रुपये, जर्बेरा ५० ते १०० रुपये, कार्नेशन १५० ते २५० रुपये, लिलियम १२०० ते १८०० रुपये आणि ऑर्चिड ४०० ते ६०० रुपये दराने उपलब्ध आहेत.
स्रोत: मूळ बातमी
Leave a Reply