वसुबारसेच्या दिवशी देवपूजा करण्याची परंपरा आहे. मात्र मुक्या जीवाची वेदना समजून घेणे आणि त्याची सेवा करणे, हीच खरी माणुसकीची पूजा असते, याचा प्रत्यय बीड जिल्हा न्यायालयाच्या आवारात आला. अपघातात पायाला गंभीर दुखापत झालेल्या एका गायीची तेथील वकिलांनी शुश्रूषा केली आणि तिला सुरक्षित निवाऱ्यापर्यंत पोहोचवले.
पाच तास वेदनेने विव्हळत पडलेली गाय
न्यायालयाच्या परिसरात ही गाय तब्बल पाच तास एकाच ठिकाणी पडून होती. तिला उठणेही शक्य होत नव्हते. तिची अवस्था पाहून वकिलांच्या पथकाने पुढाकार घेतला. दैनंदिन कामकाज बाजूला ठेवून त्यांनी पशुवैद्यकीय पथकाला बोलावले आणि गायीवर उपचार करून घेतले. उपचारानंतरही दोन दिवस वकिलांनी तिच्या खाण्यापिण्याची आणि सुरक्षिततेची काळजी घेतली. बार असोसिएशनच्या कॅन्टीनमधील कर्मचाऱ्यांनी तिला चारा व पाणी दिले.
मालकाचा शोध; अखेर गोशाळेत निवारा
गायीच्या मूळ मालकाचा शोध घेण्यासाठी सोशल मीडियावर आवाहन करण्यात आले. मात्र कोणीही पुढे आले नाही. त्यामुळे गायीची प्रकृती सुधारल्यानंतर तिला शहराजवळील पेंडगाव येथील राधे राधे गोशाळेत सुरक्षितपणे हलविण्यात आले. या उपक्रमात ॲड. दीपक कुलकर्णी, ॲड. अंकुशराव दराडे, ॲड. रमेश सोनवणे, ॲड. रणजित सोनवणे, ॲड. विकास मिसाळ, ॲड. यशवंत मुंडे, ॲड. सागर वायबट, ॲड. अजिंक्य सोनवणे, गोरक्षक पाळवदे आणि विजय गुरखुदे यांनी सहभाग घेतला.
स्रोत: मूळ बातमी
Leave a Reply