दिवाळीच्या दिवसांत अनेक घरांमध्ये मांसाहार टाळला जातो. सणाच्या या काळात शाकाहारी जेवणाला प्राधान्य दिले जाते. त्याचा थेट परिणाम पुण्याच्या बाजारपेठेवर दिसू लागला आहे. गेल्या चार दिवसांपासून मासळी, मटण आणि चिकन खरेदीकडे ग्राहकांनी पाठ फिरवली आहे. मासळीची आवक कमी झाली असून मागणीही घटल्याने सर्व प्रकारच्या मासळीच्या दरात पाच ते दहा टक्क्यांनी घट झाली आहे.
बाजारात मासळीची आवक किती?
गणेश पेठेतील घाऊक बाजारात रविवारी खोल समुद्रातील मासळी पाच ते सात टन दाखल झाली. खाडीची मासळी शंभर ते दोनशे किलो आणि नदीची मासळीही शंभर ते दोनशे किलो इतकी आली. आंध्र प्रदेशातून रहू, कतला आणि सिलन या माशांची एकत्रित पाच ते सात टन आवक झाली. पापलेट, सुरमई, रावस, कोळंबी आणि लॉबस्टर यांसारख्या माशांच्या दरातही घट नोंदवली गेली आहे. पापलेट लहान ८०० ते ९५० रुपये, सुरमई ७०० ते १००० रुपये, कोळंबी लहान १८० ते २४० रुपये आणि लॉबस्टर १८०० ते २२०० रुपये किलो दराने विकले जात आहेत. नदीतील रहू १४० ते १८० रुपये आणि कतला १६० ते २०० रुपये किलो दराने उपलब्ध आहेत.
मटण, चिकन आणि अंड्यांचे दर स्थिर
मागणी आणि पुरवठा यांचा समतोल राखला गेल्याने मटण, चिकन आणि गावरान अंड्यांचे दर गेल्या आठवड्याच्या तुलनेत स्थिर राहिले आहेत. मटण ८८० रुपये किलो, चिकन २५० रुपये किलो, तर जिवंत कोंबडी १७० रुपये किलो दराने विकली जात आहे. गावरान अंडी शेकडा १२७० रुपये दराने, तर इंग्लिश अंडी शेकडा ७११ रुपये दराने विकली जात आहेत. इंग्लिश अंड्यांच्या दरात मात्र शेकड्यामागे ४१ रुपयांनी वाढ झाली आहे.
स्रोत: मूळ बातमी
Leave a Reply