पिंपरी कॅम्प परिसरात २९ ऑक्टोबरच्या रात्री एका ड्रायफ्रूट विक्रेत्याला रस्त्यात अडवून धारदार शस्त्राचा धाक दाखवण्यात आला. त्याच्याकडील चार लाख रुपयांची रोकड लुटण्यात आली आणि त्याची दुचाकीही जबरदस्तीने पळवून नेण्यात आली. या घटनेनंतर कॅम्प भागातील व्यापारी भीतीच्या सावटाखाली आहेत. अशा घटना वारंवार घडत असल्याने व्यापाऱ्यांच्या सुरक्षेचा प्रश्न पुन्हा ऐरणीवर आला आहे.
पिंपरी कॅम्प ही शहरातील प्रमुख आणि गजबजलेली बाजारपेठ आहे. या परिसरात कपडे, इलेक्ट्रॉनिक्स, किराणा तसेच विविध प्रकारच्या वस्तू आणि उपकरणांची दुकाने आहेत. त्यामुळे सकाळपासूनच येथे नागरिकांची मोठी वर्दळ असते. मात्र दिवसभराच्या व्यवसायानंतर दुकानातील रोकड घरी घेऊन जाणाऱ्या व्यापाऱ्यांवर गुन्हेगार प्रवृत्तीचे लोक पाळत ठेवून त्यांना लक्ष्य करत असल्याचे प्रकार घडले आहेत. दुकानात शिरून हत्याराचा धाक दाखवून लूटमार केल्याच्याही घटना घडल्या आहेत. त्यामुळे दिवसभर व्यवसाय करून जमा झालेली रोकड घरी घेऊन जाताना व्यापाऱ्यांच्या मनात असुरक्षिततेची भावना निर्माण होत आहे.
व्यापाऱ्यांची मागणी
या पार्श्वभूमीवर बाजारपेठेत पोलिसांची गस्त वाढवावी आणि गुन्हेगारांवर कठोर कारवाई करावी, अशी मागणी व्यापारी वर्गातून होत आहे. पिंपरी बाजारपेठेतील पोलिसांची गस्त पूर्वीसारखी राहिलेली नाही, पोलिसांचा वचक नसल्याने या परिसरात गुन्हेगारी घटना घडत आहेत, असे माजी उपमहापौर हिरानंद उर्फ डब्बू आसवानी यांनी म्हटले आहे. रात्री दहाच्या सुमारास सर्वच हॉटेल बंद होणे आवश्यक असताना काही भागांतील हॉटेल मात्र रात्रभर सुरू असतात आणि तेथे गुन्हेगारी प्रवृत्तीचे लोक मोठ्या संख्येने जमतात, असेही त्यांनी सांगितले. वाढत्या गुन्हेगारी घटनांमुळे व्यापारी वर्ग भीतीच्या सावटाखाली असल्याचे त्यांनी नमूद केले.
दुसरीकडे पिंपरी कॅम्प परिसरात दिवस-रात्र पोलिस तैनात असल्याचे पोलिस उपायुक्त संदीप आटोळे यांनी सांगितले. स्थानिक पोलिस ठाण्याचे बीट मार्शल तसेच गुन्हे शाखेचे साध्या वेशातील कर्मचारी सतत गस्त घालत असून काही ठिकाणी फिक्स पॉइंटही नेमले आहेत. व्यापारी अथवा ग्राहकांना परिसरात काही संशयास्पद हालचाली आढळल्यास पोलिसांना कळवावे, तत्काळ आवश्यक ती मदत पोहोचवली जाईल, असे आवाहन त्यांनी केले आहे.
गुन्हे रोखण्यासाठी काय करावे?
गर्दीची ठिकाणे, अंतर्गत रस्ते आणि बाजारपेठेतील प्रवेशद्वारांवर पोलिसांची नियमित गस्त असावी, महत्त्वाच्या ठिकाणांवरील सीसीटीव्ही कॅमेरे कार्यान्वित ठेवावेत आणि घटना घडल्यानंतरच हालचाली करण्याऐवजी प्रतिबंधात्मक उपाययोजनांवर भर द्यावा, अशा सूचना यानिमित्ताने पुढे आल्या आहेत. व्यापाऱ्यांनी दिवसभरातील रोकड दुकानात उघडपणे ठेवू नये, शक्यतो डिजिटल व्यवहारांना प्राधान्य द्यावे, रात्री दुकान बंद केल्यानंतर एकट्याने जाणे टाळावे, रोकड घेऊन जाताना सुरक्षित मार्गाचा वापर करावा, दुकानाच्या परिसरात सीसीटीव्ही कॅमेरे बसवावेत, संशयास्पद व्यक्ती किंवा वाहन आढळल्यास पोलिसांना माहिती द्यावी आणि दुकानातील सुरक्षेसाठी अलार्म व इतर सुरक्षा यंत्रणा वापराव्यात, असा सल्लाही देण्यात आला आहे. आपत्कालीन परिस्थितीत हेल्पलाइन क्रमांक ११२ वर संपर्क साधता येईल.
स्रोत: मूळ बातमी
Leave a Reply