अकोला शहरात जप्त करण्यात आलेला सुमारे नऊशे किलो खवा अचानक गायब झाल्याची घटना समोर आली आहे. हा खवा कुठे गेला आणि कोणाला परत करण्यात आला, याचे उत्तर प्रशासनाकडेही नाही. त्यामुळे पोलिसांच्या कार्यपद्धतीवर प्रश्नचिन्ह उभे राहिले आहे.
बसमध्ये सापडला संशयित खवा
अहमदाबादहून आलेली एक खासगी लक्झरी बस अकोला लक्झरी स्टँडवर पोहोचली. वाहतूक पोलिसांना तपासणीत बसमध्ये मोठ्या प्रमाणात खवा आढळला. खवा संशयास्पद वाटल्याने त्यांनी तातडीने सिटी कोतवाली पोलिसांना कळवले. पोलिसांनी घटनास्थळी जाऊन पाहणी केली आणि सुमारे ९०० किलो ते एक टन खवा जप्त करून तो कोतवाली पोलिस ठाण्यात ठेवला. या प्रकरणाची माहिती अन्न व औषध प्रशासनाला देण्यात आली.
तपासणीआधीच खवा परत
अन्न व औषध प्रशासनाच्या अधिकाऱ्यांनी ठाण्यात येऊन खव्याची पाहणी केली. खवा संशयास्पद असून त्याचे नमुने घेऊन तपासणी करणे गरजेचे असल्याचे त्यांनी पोलिसांना सांगितले. मात्र सुट्टीचा दिवस असल्याने आणि सहाय्यक आयुक्त दे. गो. वीर अकोल्यात उपस्थित नसल्याने पुढील प्रक्रिया करता येणार नसल्याचे सांगण्यात आले. पोलिसांकडून खव्याचे अधिकृत हस्तांतरण झाले नसल्याचे प्रशासनाच्या अधिकाऱ्यांनी स्पष्ट केले.
दुसऱ्याच दिवशी कोतवाली पोलिसांनी अन्न व औषध प्रशासनाच्या कार्यालयाला पत्र दिले. त्यात जप्त केलेला खवा मूळ मालकाचा शोध घेऊन अटी व शर्तीवर परत केल्याचे नमूद होते. मात्र त्या पत्रात मालकाचे नाव, पत्ता किंवा संपर्क क्रमांक यांचा उल्लेख नव्हता. त्यामुळे हा खवा नेमका कोणाला आणि कोणत्या आधारावर परत केला, याबाबत संभ्रम निर्माण झाला आहे.
खव्याचे नमुने तपासणीसाठी न घेताच तो परत केल्याने पोलिसांच्या कारवाईवर प्रश्न उपस्थित होत आहेत. अन्न व औषध प्रशासनाच्या सहाय्यक आयुक्तांनी सांगितले की, जप्त खव्याबाबत माहिती देण्यात आली होती, पण तो हस्तांतरित करण्यात आला नव्हता. आज खवा कुठे आहे, याबाबत त्यांच्या कार्यालयाला कोणतीही कल्पना नाही.
स्रोत: मूळ बातमी
Leave a Reply