जालन्यामध्ये मुख्यमंत्री एकनाथ शिंदे यांच्या शिवसेनेला मोठा राजकीय धक्का बसला आहे. मंठा-परतूर विधानसभा मतदारसंघातील सर्व तालुकाप्रमुखांसह स्थानिक पदाधिकाऱ्यांनी सामूहिक राजीनामे दिले आहेत. शिवसेना जिल्हाप्रमुख ए. जे. बोराडे यांच्या मनमानी कार्यपद्धतीवर तीव्र नाराजी व्यक्त करत सर्व पदाधिकाऱ्यांनी पक्ष सोडण्याचा निर्णय घेतला आहे.
बोराडे यांच्यावर काय आरोप आहेत?
विधानसभा निवडणुकीतील पराभवानंतर ए. जे. बोराडे यांनी एकनाथ शिंदे यांच्या शिवसेनेत प्रवेश केला होता. त्यानंतर त्यांची जिल्हाप्रमुखपदी निवड झाली होती. मात्र निष्ठावंत पदाधिकाऱ्यांना डावलून बोराडे स्वतःच्या मर्जीने पक्षाचे सर्व उपक्रम राबवत असल्याचा आरोप करण्यात आला आहे. या पार्श्वभूमीवर मंठा येथील तालुकाप्रमुखांसह सर्व पदाधिकाऱ्यांनी पक्षाला सामूहिक राजीनामा पाठवला आहे.
गेल्या वर्षभरापासून पक्षात सातत्याने डावलले जात असल्याचा आरोप तालुकाप्रमुख उदय बोराडे यांनी केला आहे. मुख्यमंत्री एकनाथ शिंदे यांनी ‘आनंदाचा शिधा’ पाठवला होता. मात्र त्याच्या वाटपासाठी एकाही स्थानिक कार्यकर्त्याला किंवा पदाधिकाऱ्याला बोलावण्यात आले नाही, असे उदय बोराडे म्हणाले. बोराडे यांनी स्वतःच्या नातेवाइकांच्या आणि मर्जीतील लोकांच्या हस्ते शिधावाटप केल्याचा आरोप त्यांनी केला आहे. शिंदे यांच्या सच्चा आणि प्रामाणिक कार्यकर्त्यांना विश्वासात न घेताच हा प्रकार करण्यात आल्याचेही त्यांनी म्हटले आहे.
राजीनामे थेट शिंदे यांच्याकडे
राजीनामा दिल्यानंतर पत्रकारांशी बोलताना पदाधिकाऱ्यांनी आपली भूमिका स्पष्ट केली. पक्षावर किंवा पक्षाच्या वरिष्ठ नेत्यांवर कोणतीही नाराजी नसल्याचे त्यांनी सांगितले. आपला विरोध फक्त स्थानिक जिल्हाप्रमुखांच्या मनमानी कारभाराला असल्याचे त्यांनी म्हटले. सर्वांनी स्वाक्षरी केलेले सामूहिक राजीनामे थेट पक्षप्रमुख एकनाथ शिंदे यांच्याकडे पाठवणार असून आता यावर शिंदे यांनीच योग्य तो निर्णय घ्यावा, अशी मागणी पदाधिकाऱ्यांनी केली आहे.
स्रोत: मूळ बातमी
Leave a Reply