भारतीय जनता पक्षाचे विधान परिषदेचे आमदार संजय केणेकर यांनी महाविकास आघाडीवर जोरदार टीका केली आहे. छत्रपती संभाजीनगर येथे माध्यमांशी बोलताना त्यांनी फटाक्यांची उपमा देत आघाडीतील नेत्यांवर निशाणा साधला. महाविकास आघाडी हा सर्वात मोठा फुसका फटाका असल्याचे ते म्हणाले.
केणेकर नेमके काय म्हणाले?
वात पेटल्यावरही जो फटाका फुटत नाही, तो लवंगी फटाका म्हणजे उद्धव ठाकरे, असे केणेकर म्हणाले. संजय राऊत म्हणजे स्वतःच्या हातातच फुटणारा फटाका असल्याचे त्यांनी म्हटले. शरद पवार यांनी समोरून वात लावली की तो फटाका मागून फुटतो, असा टोलाही त्यांनी लगावला. दुसरीकडे देवेंद्र फडणवीस म्हणजे सातत्याने समृद्धीची रोषणाई करणारा फटाका असून एकनाथ शिंदे म्हणजे कणखर आणि सातत्याने प्रज्वलित राहणारा फटाका असल्याचे केणेकर म्हणाले. महायुतीचे तीन फटाके सातत्याने रोषणाई देत असल्याचे त्यांनी सांगितले.
संजय राऊत यांच्या फटाक्यामुळेच शिवसेना उद्ध्वस्त झाली, असेही केणेकर म्हणाले. त्यांच्या आतषबाजीमुळे घरातच पेट लागल्याचे त्यांनी म्हटले. ज्यांच्या वातीच पेटल्या नाहीत, त्या फटाक्यांबद्दल बोलायचे तरी काय, ते आता फटाकेच राहिले नाहीत, असेही ते म्हणाले.
ठाकरेंवर निशाणा, शेतकऱ्यांचा उल्लेख
कोरोनाचा काळ असो किंवा दुष्काळाचा, भाजपचे नेते कधीच एका जागी थांबले नाहीत, असे केणेकर म्हणाले. शेतकऱ्यांच्या बांधावर जाऊन त्यांना समृद्ध करण्याची भावना नेत्यांनी ठेवली, असे त्यांनी सांगितले. घरातून सरकार चालवणाऱ्या नेत्याचा काळ आठवण्याचे आवाहन त्यांनी केले. भारतीय जनता पार्टी आणि महायुती सरकार ही दिवाळी शेतकऱ्यांच्या बाबतीत सुख-समृद्धीची जावी, या उद्दिष्टाने कामाला लागले असल्याचे केणेकर म्हणाले. महाराष्ट्रातील शेतकऱ्याला दुष्काळातून बाहेर काढण्यासाठी अंमलबजावणी सुरू असल्याचेही त्यांनी सांगितले.
स्रोत: मूळ बातमी
Leave a Reply