माधुरी दीक्षितचा मुलगा अरिन नेने कोण? ॲपलमध्ये काय करतो?

अभिनेत्री माधुरी दीक्षितचा मुलगा अरिन नेने सध्या चर्चेत आला आहे. फॅशन डिझायनर मनीष मल्होत्रा यांच्या दिवाळी पार्टीत माधुरी कुटुंबासह गेली होती. तिथे अरिनसोबत त्याची गर्लफ्रेंड खुशीही आली होती. अरिन आणि खुशी एकत्र दिसल्याने लगेच त्यांची चर्चा सुरू झाली आणि अरिनही प्रकाशझोतात आला. त्यानंतर अरिन नेमका करतो काय आणि त्याचे शिक्षण कुठपर्यंत झाले, याबद्दल सर्वांनाच उत्सुकता लागली आहे. अरिनचे फोटो समाजमाध्यमांवर मोठ्या प्रमाणात पसरत आहेत. त्याचे रूप पाहून अनेकांना तो माधुरी दीक्षितसारखाच दिसतो, असे वाटते. त्याची व्यक्तिमत्त्वाची छाप कोणत्याही अभिनेत्याला टक्कर देईल अशी आहे. त्यामुळे अरिन भविष्यात सिनेमात येणार की आपली वाट वेगळी निवडणार, याकडे सर्वांचे लक्ष लागले आहे.

शिक्षण आणि सुरुवात

माधुरी दीक्षित आणि श्रीराम नेने यांना दोन मुले आहेत, अरिन आणि रायन. अरिनचा जन्म 17 मार्च 2003 रोजी अमेरिकेच्या कोलोरॅडो राज्यातील डेनवर येथे झाला. तो 23 वर्षांचा आहे. अरिनचे प्राथमिक शिक्षण भारतात अमेरिकन स्कूल ऑफ बॉम्बेमध्ये झाले. त्यानंतर तो उच्च शिक्षणासाठी अमेरिकेत गेला. तिथे त्याने 2017 ते 2021 या काळात आयबी डिप्लोमा पूर्ण केला. त्यानंतर त्याने अमेरिकेच्या युनिव्हर्सिटी ऑफ साऊदर्न कॅलिफोर्नियाच्या व्हिटर्बी स्कूल ऑफ इंजिनिअरिंगमधून इंजिनिअरिंगची पदवी घेतली. त्याने कॉम्प्युटर सायन्स आणि बिझनेस अॅडमिनिस्ट्रेशनमध्ये बॅचलर ऑफ सायन्सची पदवी घेतली आहे. त्यासोबतच त्याने म्युझिक प्रोडक्शनमध्ये मायनर कोर्सही पूर्ण केला आहे. शिक्षणादरम्यान त्याने कॅलिफोर्नियात फेसबुकच्या मार्केटिंग टीमसोबत पाच महिने इंटर्नशिप केली. तिथे त्याला प्रत्यक्ष कामाचा अनुभव मिळाला.

ॲपलमध्ये सध्याचे काम

अरिन सध्या तंत्रज्ञान कंपनी ॲपलमध्ये मशीन लर्निंग इंजिनिअर म्हणून कार्यरत आहे. माधुरीच्या सांगण्यानुसार, तो नॉइज कॅन्सेलेशनशी संबंधित प्रकल्पावर काम करत आहे. अरिनने 2025 मध्येच त्याचे शिक्षण पूर्ण केले असून कॉर्पोरेट क्षेत्रात काम सुरू केले आहे. त्यामुळे त्याची वैयक्तिक संपत्ती किती आहे, याची माहिती उपलब्ध नाही. पण त्याचे आईवडील माधुरी दीक्षित आणि डॉ. श्रीराम नेने यांची संपत्ती 350 ते 400 कोटी रुपये असल्याचे सांगितले जात आहे. अरिनने अभियांत्रिकी आणि संगीत निर्मिती या दोन्ही क्षेत्रांत शिक्षण घेतले असून, त्याने कॉर्पोरेट क्षेत्रातील वाट निवडली आहे. सिनेमात येण्याबाबत त्याने अद्याप कोणतीही घोषणा केलेली नाही.

स्रोत: मूळ बातमी