लग्न म्हटलं की घरात प्रचंड लगबग सुरू होते आणि प्रत्येक गोष्टीवर मोठा खर्च होतो. लग्नात काहीही कमी पडू नये यासाठी घरातील लोक प्रचंड मेहनत घेतात. अशातच बहिणीच्या लग्नाचे निमंत्रण घेऊन जात असताना गाडीतील पत्रिका रस्त्यावर पसरल्या आणि मोठी अडचण निर्माण झाली. पण महामार्गावरून जाणाऱ्या अनोळखी लोकांनी आपल्या गाड्या थांबवल्या आणि त्या पत्रिका गोळा करण्यासाठी धाव घेतली. या घटनेचा व्हिडिओ समाजमाध्यमांवर व्हायरल होत आहे.
बहिणीच्या लग्नासाठी छापलेल्या लग्नपत्रिका घेऊन एक तरुण प्रवास करत होता. प्रवासादरम्यान त्या पत्रिका बेंगळुरू येथील महामार्गावर विखुरल्या. एकीकडे वेगाने वाहणारी वाहनं आणि दुसरीकडे इतका खर्च करून छापलेल्या लग्नाच्या पत्रिका. अशा वेळी त्या एकट्यासाठी पत्रिका गोळा करणे जवळपास अशक्य होते. ही अडचण पाहून महामार्गावरून जाणाऱ्या काही लोकांनी आपली वाहनं थांबवली आणि रस्त्यावर पडलेल्या लग्नपत्रिका गोळा करण्यासाठी तरुणाला मदत केली. त्यामुळे माणुसकीचे सुंदर दृश्य पाहायला मिळाले.
व्हिडिओ पाहून नेटकरी भावूक
या घटनेचा व्हिडिओ समाजमाध्यमांवर व्हायरल झाल्यानंतर अनेकांनी या अनोळखी लोकांचे कौतुक केले आहे. आजच्या धावपळीच्या या जगात स्वतःचे काम बाजूला ठेवून दुसऱ्याच्या मदतीला धावून जाणारी माणसं पाहून अनेकांनी समाधान व्यक्त केले आहे. बहिणीच्या लग्नासाठी अनेक भाऊ एकवटले, अशा प्रतिक्रिया लोकांनी दिल्या आहेत.
काही वेळा मोठी मदत करण्यासाठी ओळखीची गरज नसते. फक्त मदतीची भावना असावी लागते, अशा प्रतिक्रिया या व्हिडिओवर उमटत आहेत. वाऱ्यामुळे विखुरलेल्या पत्रिका गोळा करण्यासाठी अनोळखी लोकांनी दाखवलेले हे सहकार्य अनेकांच्या मनाला भिडले आहे.
स्रोत: मूळ बातमी
Leave a Reply