विराट कोहली फ्लॉप ठरला, तरीही इतिहास; पाँटिंगचा विक्रम मोडला

भारताचा स्टार क्रिकेटपटू विराट कोहलीने न्यूझीलंडविरुद्ध पहिल्या वनडेत शानदार अर्धशतक झळकवले होते. पण दुसऱ्या वनडेत तो फ्लॉप ठरला. शनिवारी वेलिंग्टनमध्ये सात चेंडूत त्याने सात धावा केल्या. यात एका चौकाराचा समावेश होता. वेगवान गोलंदाज जेकब डफीने चौथ्या ओव्हरच्या चौथ्या चेंडूवर त्याला बाद केले. कोहलीने ऑफ स्टम्पच्या लाईनमध्ये आलेला चेंडू ड्राइव्ह करण्याचा प्रयत्न केला, पण कव्हरला विल यंगकडे त्याने सोपा झेल दिला. कोहली वेलिंग्टन वनडेत मैदानावर जास्त वेळ पाय रोवून उभा राहू शकला नाही. पण तरीही तो इतिहास रचण्यात यशस्वी ठरला. विराट कोहली वनडे क्रिकेटमध्ये न्यूझीलंडविरुद्ध सर्वाधिक धावा करणारा क्रिकेटपटू बनला आहे.

कोहलीची न्यूझीलंडविरुद्धची कामगिरी

३८ वर्षीय कोहलीने न्यूझीलंडविरुद्ध आतापर्यंत ३८ वनडे सामन्यांत ५६.५१ च्या सरासरीने १९७८ धावा केल्या आहेत. यात सात शतके आणि ११ अर्धशतके आहेत. वर्ष २०१० मध्ये कोहली न्यूझीलंडविरुद्ध पहिला वनडे सामना खेळला होता. कोहलीने रिकी पाँटिंगचा दमदार विक्रम मोडला. ऑस्ट्रेलियाचा माजी कर्णधार राहिलेल्या रिकी पाँटिंगने न्यूझीलंडविरुद्ध ५१ वनडे सामन्यांत ४५.८३ च्या सरासरीने १९७१ धावा केल्या होत्या. त्याने सहा शतके आणि १२ अर्धशतके झळकवली होती. कोहलीने वेलिंग्टन वनडेत एक धाव घेताच त्याने पाँटिंगला मागे टाकले. ऑकलंड वनडेत विराट कोहलीने ७४ धावा केल्या होत्या.

यादीत सचिन तिसऱ्या स्थानावर

वनडे क्रिकेटमध्ये न्यूझीलंडविरुद्ध सर्वाधिक धावा बनवणाऱ्या फलंदाजांच्या बाबतीत सचिन तेंडुलकर तिसऱ्या स्थानावर आहे. सचिनने ४२ सामन्यांत ४६.०५ च्या सरासरीने न्यूझीलंडविरुद्ध १७५० धावा केल्या आहेत. या यादीत कुमार संगकारा १५६८ धावांसह चौथ्या, सनथ जयसूर्या १५१९ धावांसह पाचव्या, तर जॅक्स कॅलिस १४४९ धावांसह सहाव्या स्थानावर आहे.

वेलिंग्टनमध्ये १३५ धावांच्या लक्ष्याचा पाठलाग करताना टीम इंडियाची खराब सुरुवात झाली. कर्णधार शुभमन गिल गोल्डन डक म्हणजे पहिल्या चेंडूवर बाद झाला. गिलला डफीने दुसऱ्या ओव्हरच्या पहिल्याच चेंडूवर हेनरी निकोलसकरवी झेलबाद केले. त्यानंतर फलंदाजीस आलेला कोहली आधी डॉट बॉल खेळला, मग पुढच्या चेंडूवर चौकार मारला आणि पाँटिंगचा विक्रम मोडला. पहिल्या वनडेत रोहित शर्मा शून्यावर बाद झाला होता. दुसऱ्या वेलिंग्टन वनडेत रोहितने २८ चेंडूत दोन चौकार आणि एका षटकाराच्या मदतीने २३ धावा केल्या. जॅमीसनच्या नवव्या ओव्हरमध्ये तो पॅव्हेलियनमध्ये परतला.

स्रोत: मूळ बातमी