धाराशिव जिल्ह्यात यंदा रब्बी हंगामाच्या पेरण्यांना दुष्काळाचा मोठा फटका बसला आहे. जिल्ह्यात रब्बीचे सरासरी क्षेत्र ४ लाख १७ हजार हेक्टर असताना आतापर्यंत केवळ ३७ हजार ९४४ हेक्टर क्षेत्रावरच पेरण्या झाल्या आहेत. म्हणजेच सरासरीच्या तुलनेत फक्त नऊ टक्के पेरणी झाली आहे.
जिल्ह्यात पडलेला तुटपुंजा पाऊस, भूजल पातळीत झालेली तीव्र घट आणि सिंचनाचे उपलब्ध स्रोत आटल्यामुळे शेतकऱ्यांकडे पेरणीसाठी ओलावा किंवा पाण्याची उपलब्धता राहिलेली नाही. रब्बीचा मुख्य आधार असलेल्या ज्वारी आणि हरभऱ्यासारख्या पिकांच्या पेरण्याही अपुऱ्या पाण्यामुळे रखडल्या आहेत. ४ लाख १७ हजार हेक्टरच्या तुलनेत केवळ ३७ हजार हेक्टरहून थोडे अधिक क्षेत्र पेरणीखाली येणे हे शेतकरी किती मोठ्या संकटात सापडले आहेत, याची साक्ष देते.
कोणत्या पिकाची किती पेरणी झाली?
ज्वारी : २५ हजार ३५२ हेक्टर, हरभरा : ११ हजार ७४१ हेक्टर, गहू : १ हजार १४२ हेक्टर, करडई : ६२६ हेक्टर, इतर तृणधान्ये : १३१ हेक्टर, इतर कडधान्ये : १२२ हेक्टर आणि इतर गळीत धान्ये : ३ हेक्टर अशी पेरणी झाली आहे. याशिवाय ऊस १६ हजार ३९६ हेक्टरवर असून, मका, तीळ आणि सूर्यफूल या पिकांची पेरणी शून्य राहिली आहे.
पेरण्या घटल्याचे संभाव्य परिणाम
रब्बी हंगाम हा या भागातील शेतकऱ्यांच्या अर्थव्यवस्थेचा मुख्य कणा मानला जातो. उत्पादन घटल्यामुळे शेतकऱ्यांच्या हातात पैसा येणार नाही आणि परिणामी ग्रामीण अर्थव्यवस्था संकटात येण्याची शक्यता आहे. ज्वारी आणि कडधान्यांचे उत्पादन मोठ्या प्रमाणावर घटल्यामुळे आगामी काळात ज्वारीची टंचाई भासण्याची शक्यता आहे. ज्वारीचा कडबा हा जनावरांच्या चाऱ्याचा मुख्य स्रोत आहे; तुटपुंज्या पेरण्यांमुळे कडबा अत्यंत कमी प्रमाणात उपलब्ध होणार असून चाऱ्याची मोठी टंचाई निर्माण होण्याची चिन्हे आहेत. शेतातून उत्पन्न मिळण्याची चिन्हे नसल्याने संसाराचा खर्च आणि मुलांच्या शिक्षणाचा खर्च भागविण्यासाठी आर्थिक ओढाताण वाढू शकते, तसेच मजुरीच्या कामांची मागणी वाढू शकते.
स्रोत: मूळ बातमी
Leave a Reply