नाशिक जिल्ह्यात नोव्हेंबरच्या सुरुवातीलाच पाणीटंचाईची चाहूल लागली आहे. दिवाळीच्या सणाच्या काळातच जिल्ह्यातील १०३ गावे आणि वाड्यांमध्ये पाण्याची टंचाई जाणवत आहे. या भागांतील नागरिकांना टँकरने पाणीपुरवठा करावा लागत आहे. सध्या ३७ टँकरच्या माध्यमातून ७१ हजार ७२९ नागरिकांची पाण्याची गरज भागवली जात आहे. जिल्हा प्रशासनाने टंचाई निवारणासाठी कृती आराखडा तयार करून अंतिम मान्यतेसाठी सरकारकडे सादर केला आहे.
येवला तालुक्यात सर्वाधिक टंचाई
येवला तालुक्यात पाणीटंचाई सर्वाधिक जाणवत आहे. तालुक्यातील २७ गावे आणि ५५ वाड्या-वस्त्या अशा एकूण ८२ ठिकाणी २९ टँकरद्वारे ५२ हजार ८६९ नागरिकांना पिण्याचे पाणी दिले जात आहे. याशिवाय चांदवड आणि देवळा तालुक्यातील प्रत्येकी एका गावासाठी एक टँकर सुरू आहे. मालेगाव तालुक्यातील सहा गावे आणि १४ वाड्यांसाठी सहा टँकरने पाणीपुरवठा केला जात आहे. सध्या जिल्ह्यात ३५ गावे आणि ६९ वाड्या-वस्त्यांना ३७ टँकरद्वारे पाणी दिले जात आहे. पावसाने खंड दिल्यामुळे यंदा जिल्ह्यावर दुष्काळाचे संकट आहे. नोव्हेंबरच्या प्रारंभीच काही तालुक्यांमध्ये पाणीटंचाईने डोके वर काढले आहे. त्यामुळे दिवाळीच्या तोंडावर ग्रामीण भागात टँकर सुरू झाले आहेत.
१३.८४ कोटींचा कृती आराखडा
जिल्ह्यातील संभाव्य टंचाईच्या पार्श्वभूमीवर जिल्हा परिषदेने १३ कोटी ८४ लाख ४२ हजार रुपयांचा कृती आराखडा तयार केला आहे. या आराखड्यानुसार जिल्ह्यातील ८२२ गावे आणि १२८४ वाड्या-वस्त्यांना टंचाईची झळ बसण्याचा अंदाज आहे. या ठिकाणी टँकरने पाणीपुरवठा करण्यासह विविध उपाययोजना प्रस्तावित करण्यात आल्या आहेत. त्यात ३५५ टँकर प्रस्तावित करण्यात आले आहेत. हा आराखडा अंतिम मान्यतेसाठी सरकारकडे सादर करण्यात आला आहे.
स्रोत: मूळ बातमी
Leave a Reply