नोव्हेंबरमध्येही उन्हाचा तडाखा; नारळ पाणी महागले

साधारणपणे ऑक्टोबरनंतर वातावरणात गारवा जाणवू लागतो; मात्र यंदा नोव्हेंबरमध्येही नवी मुंबईकरांची उन्हापासून सुटका झालेली नाही. तापमानाचा पारा ३६ अंशांपर्यंत पोहोचत असल्याने दुपारच्या उन्हाचा तडाखा नागरिकांना सहन करावा लागत आहे. उष्णतेपासून दिलासा मिळवण्यासाठी नागरिकांनी नैसर्गिक पेयांकडे मोर्चा वळवला असून, नारळ पाण्याला विशेष पसंती मिळत आहे. वाढत्या मागणीमुळे नारळाच्या भावातही सुमारे २० टक्क्यांनी वाढ झाली आहे.

स्टॉलवर दुपारी ग्राहकांची गर्दी

वाशी, नेरूळ, बेलापूर, घणसोली आणि ऐरोली परिसरातील नारळ पाण्याच्या स्टॉलवर दुपारच्या वेळी ग्राहकांची गर्दी होत आहे. उन्हामुळे घामावाटे शरीरातील पाणी आणि क्षार कमी होत असल्याने अनेकजण शीतपेयांऐवजी नारळ पाण्याला पसंती देत आहेत. नैसर्गिक पेय म्हणून नारळ पाण्याची मागणी वाढल्याचे विक्रेत्यांनी सांगितले. गतवर्षी ६० ते ७० रुपयांना मिळणारा नारळ आता आकारमानानुसार ७० ते ९० रुपयांना विकला जात आहे. मागणी वाढल्याने भावात सुमारे २० टक्क्यांची वाढ झाल्याचे विक्रेत्यांचे म्हणणे आहे.

शरीराचे संतुलन राखण्यास मदत

नारळ पाण्यात पोटॅशियम आणि विविध इलेक्ट्रोलाइट्स असतात. त्यामुळे शरीरातील द्रवपदार्थांचे संतुलन राखण्यास मदत होते, मात्र नियमित पाणी पिणे आणि योग्य आहार घेणेही आवश्यक आहे, असे जनरल फिजिशियन डॉ. प्रतीक तांबे यांनी सांगितले.

स्रोत: मूळ बातमी