मुंबईत घरे मिळवण्याचा गिरणी कामगारांचा लढा गेल्या अनेक वर्षांपासून सुरू आहे. मात्र, आता या प्रश्नावर कामगार संघटनेने एक नवी भूमिका घेतली आहे. मुंबईत घरे देणे सरकारला जमत नसल्याचे लक्षात आल्यानंतर शेलू येथील घरांबाबत सकारात्मक पाऊल टाकण्याचा निर्णय घेण्यात आला आहे. शेलू मध्येच गिरणगाव उभे करण्याचा निर्धार कामगारांनी व्यक्त केला आहे.
वसईत शिबिर; कामगारांची नाराजी
गिरणी कामगार संघर्ष समितीच्या वतीने नुकतेच वसई पश्चिम येथे मुंबईतील विभागवार कार्यकर्त्यांचे शिबिर पार पडले. या शिबिरात सत्तर ते ऐंशी कार्यकर्त्यांनी सहभाग घेतला. घरांबाबतच्या सरकारी धोरणावर झालेल्या चर्चेत कामगारांनी नाराजी व्यक्त केली. सरकारचे बोलणे आणि प्रत्यक्ष कृती यात फरक असल्याचा सूर या चर्चेत उमटला. सरकारने काढलेल्या गेल्या तीन शासन निर्णयांमध्ये घरांसाठी निविदा मागवण्यात आल्या, मात्र त्यात मुंबईत घर देण्याचा उल्लेखच नसल्याचा आरोप कामगारांनी केला. दिवसेंदिवस घरांचा प्रश्न अधिक जटिल होत चालल्याने आता आणखी वाट पाहणे शक्य नसल्याचे कामगारांनी सांगितले.
किमती कमी करा, प्रकल्प वेळेत पूर्ण करा
शेलू येथे घरे घेण्यास आमची तयारी आहे, मात्र सरकारने घरांच्या किमती कमी करून प्रकल्प तातडीने पूर्ण करावा, अशी मागणी शिबिरात करण्यात आली. शेलू मध्येच आम्ही गिरणगाव साकार करू, असा आत्मविश्वास कामगारांनी व्यक्त केला. या शिबिराला समितीचे अध्यक्ष प्रवीण घाग, सचिव प्रविण येरुणकर, मारुती जाधव, लक्ष्मण ओंबळे, बाबन राणे, प्रकाश नाईक आदी उपस्थित होते.
जे मिळते ते स्वीकारून पुढील लढा
राज्य सरकारकडून सध्या जे मिळते ते स्वीकारून पुढील हक्कासाठी पुन्हा संघर्ष करण्याचा निर्णयही या शिबिरात घेण्यात आला. खटाव मिल, सेन्च्युरी मिल, एनटीसी गिरण्या आणि ज्या गिरण्यांची जमीन मिळणे अजून बाकी आहे, त्यांना पाठिंबा देऊन लढा सुरू ठेवण्याचे ठरले. त्यामुळे शेलूच्या घरांचा प्रश्न मार्गी लावतानाच मुंबईतील घरांचा लढाही थांबणार नसल्याचे स्पष्ट झाले आहे.
स्रोत: मूळ बातमी
Leave a Reply