दिवाळी म्हटले की अनेकांचे लक्ष दिवाळी पहाटकडे लागलेले असते. लातूर शहरातील वेगवेगळ्या संस्था दिवाळी पहाट या स्वरमैफली आयोजित करण्यासाठी आता पुढाकार घेऊ लागल्या आहेत. त्यामुळेच यंदाच्या दिवाळीत शहरातील विविध ठिकाणी सुरेल स्वरांची मेजवानी उपलब्ध झाली आहे. या निमित्ताने शास्त्रीय गायनाबरोबरच व्हायोलिन, पखवाज आणि शहनाई वादनही अनुभवण्याची संधी लातूरच्या श्रोत्यांना मिळाली आहे.
सुरमयी दिपावली पहाट
सरस्वती संगीत कला महाविद्यालय, मराठवाडा संगीत कला अकादमी, दत्त मंदिर संस्थान, डीएस ग्रुप, रोटरी क्लब (श्रेयस), आमचं ग्रीन लातूर वृक्ष फाउंडेशन, मानव संस्कृती आचार मंच आणि स्वरांगिनी मंडळ यांच्या संयुक्त विद्यमाने शुक्रवारी, ६ नोव्हेंबर रोजी पहाटे ५:४५ वाजता दत्त मंदिर येथे सुरमयी दिपावली पहाट होणार आहे. यात व्हायोलिनवादक गुंजन शिरभाते (नांदेड), पखावज वादक ब्रह्मराज कांबळे (पुणे) आणि गायक अनिरुद्ध वाघचौरे (सोलापूर) यांची संतवाणी सादर होणार आहे. गायक प्रा. लक्ष्मण श्रीमंगले, पद्मजा गंदे, प्रा. शिवकुमार उरगुंडे, प्रा. विलास गारोळे, प्रा. विनोद राणे (नांदेड), प्रा. विश्वनाथ स्वामी, तुकाराम आवाड आणि प्रा. गणेश बोरगावकर हे कलावंत आपली सेवा रुजू करणार आहेत. या वेळी उपविभागीय अधिकारी रोहिणी नऱ्हे-विरोळे, उपमहापौर ॲड. स्नेहल उटगे आणि अमृत महाराज आदी उपस्थित राहणार आहेत.
स्वर दीपोत्सव आणि दिवाळी पहाट
राज्य शासनाच्या सांस्कृतिक कार्य संचालनालयाच्या वतीने स्वर दीपोत्सव ही मैफल आयोजित करण्यात आली आहे. यात कल्याण अपार हे शहनाई वादन तर वृषाली देशमुख हे शास्त्रीय गायन सादर करणार आहेत. हा स्वर दीपोत्सव अष्टविनायक मंदिरातील गणेश हॉल येथे शुक्रवारी, ६ नोव्हेंबर रोजी सायंकाळी सहा वाजता होणार आहे.
याशिवाय अष्टविनायक प्रतिष्ठानतर्फे होणाऱ्या दिवाळी पहाटकडे असंख्य लातूरकरांचे लक्ष लागलेले असते. लक्ष्मीपूजनाच्या दिवशी, ८ नोव्हेंबर रोजी पहाटे पाच वाजता सुरू होणाऱ्या या मैफलीत सायली टाक, शर्वरी डोंगरे आणि उन्नती मुंढे या लातूरच्या गायिका गायन सादर करणार आहेत.
स्रोत: मूळ बातमी
Leave a Reply