येवला तालुक्यातील पारेगाव येथील एका शेतकऱ्याने विहिरीत उडी घेऊन आत्महत्या केल्याची हृदयद्रावक घटना घडली आहे. सततची नापिकी, त्यातून वाढलेले कर्ज आणि कुटुंबापुढील आर्थिक विवंचना यामुळे ते तणावात होते. ऐन दिवाळीच्या सणात घडलेल्या या घटनेने परिसरात शोककळा पसरली आहे.
दोन वर्षांची नापिकी आणि वाढता कर्जबोजा
अशोक लक्षण खिल्लारे (५९) असे या शेतकऱ्याचे नाव आहे. दोन वर्षांपासून सततची नापिकी, शेतीच्या उत्पादन खर्चात झालेली वाढ आणि शेतमालाला अपेक्षित भाव मिळत नसल्याने त्यांची आर्थिक परिस्थिती खालावत चालली होती. खरिपाचे उत्पन्न न आल्याने ते याबाबत कुटुंबाकडे सतत चिंता व्यक्त करत होते. हात उसने आणि इतर कर्जामुळे ते सतत तणावात असायचे, अशी माहिती कुटुंबीयांनी दिली आहे. दिवाळीचा सण साजरा करण्याची चिंता, कर्जाची परतफेड आणि कुटुंबाचा उदरनिर्वाह असे अनेक प्रश्न त्यांच्यासमोर होते.
गावात शोककळा
सोमवारी रात्री (२ नोव्हेंबर) दहाच्या सुमारास त्यांनी राहत्या घराशेजारील विहिरीत उडी घेतली आणि या घटनेत त्यांचा मृत्यू झाला. घटनेची माहिती समजताच नातेवाईक, मित्रपरिवार आणि परिसरातील नागरिकांनी घटनास्थळी धाव घेतली. ही माहिती महसूल प्रशासनासह पोलिसांना देण्यात आल्यानंतर चौकशी सुरू आहे. मंगळवारी (३ नोव्हेंबर) सकाळी शोकाकुल वातावरणात पारेगाव अमरधाम येथे त्यांच्यावर अंत्यसंस्कार करण्यात आले. ऐन दिवाळीच्या सणासुदीत एका शेतकरी कुटुंबावर दुःखाचा डोंगर कोसळल्याने पारेगावसह संपूर्ण तालुक्यात हळहळ व्यक्त होत आहे.
स्रोत: मूळ बातमी
Leave a Reply