कांदिवली येथील भारतरत्न डॉ. बाबासाहेब आंबेडकर महापालिका शताब्दी रुग्णालयात रुग्णांसाठी डिजिटल पेमेंटची सुविधा सुरू करण्यात आली आहे. पहिल्या टप्प्यात ही सुविधा बाह्यरुग्ण विभागात उपलब्ध करून देण्यात आली आहे. त्यामुळे आता रुग्णांना यूपीआय तसेच इतर डिजिटल माध्यमांतून उपचार शुल्क भरता येणार आहे. रोख रकमेवर अवलंबून राहावे लागण्याची अडचण या सुविधेमुळे दूर होणार आहे.
आतापर्यंत बाह्यरुग्ण विभागाची नोंदणी पावती घेण्यासाठी किंवा इतर शुल्क भरण्यासाठी रुग्णांना रोख रक्कम जवळ ठेवावी लागत होती. अनेकदा सुट्टे पैसे उपलब्ध नसल्याने रुग्ण आणि त्यांच्या नातेवाइकांना त्रास सहन करावा लागत होता. शुल्क भरण्याच्या काउंटरवर गर्दी होत असल्याने रांगेत बराच वेळ थांबावे लागत होते. डिजिटल पेमेंटमुळे ही प्रक्रिया वेगवान होण्यास मदत होणार आहे.
सुविधेचा विस्तार करण्याचे नियोजन
रुग्णालय प्रशासनाकडून या सुविधेचा विस्तार करण्याचे नियोजन करण्यात आले आहे. आगामी काळात आंतररुग्ण विभागात दाखल असलेल्या रुग्णांचे शुल्क, प्रयोगशाळेतील विविध तपासण्या तसेच औषध विभागातील देयकांसाठीही ऑनलाइन पेमेंट सुरू केले जाणार आहे. त्यामुळे रुग्णालयातील बहुतांश आर्थिक व्यवहार डिजिटल पद्धतीने करण्याचा मार्ग मोकळा होईल.
ऑनलाइन पेमेंटमुळे रुग्णांना शुल्क भरणे अधिक सोपे झाले आहे. यापुढे शुल्क भरण्यासाठी रांगेत उभे राहावे लागू नये, यासाठीही नियोजन सुरू आहे. रुग्णालयातील वॉर्डमध्ये क्यूआर कोड किंवा पेमेंट मशीन उपलब्ध करून दिल्यास रुग्णांना वॉर्डमधूनच शुल्क भरता येईल, असे रुग्णालयाचे वैद्यकीय अधीक्षक डॉ. अजय गुप्ता यांनी सांगितले.
स्रोत: मूळ बातमी
Leave a Reply