दीपोत्सव अवघ्या काही दिवसांवर आल्याने धुळ्यातील बाजारपेठा आकर्षक आकाशकंदील, विद्युत माळा व सजावटीच्या साहित्याने उजळून निघाल्या आहेत. यंदाच्या दिवाळीत मेड इन इंडिया उत्पादनांना चांगली मागणी असून, पारंपरिक कलाकुसर व पर्यावरणपूरक साहित्याचा संगम असलेल्या कंदिलांनी ग्राहकांचे विशेष लक्ष वेधले आहे. फुलवाला चौक, साक्री रोड, देवपूर व दत्त मंदिर परिसरातील बाजारपेठा विविधरंगी व नक्षीदार कंदिलांनी फुलून गेल्या आहेत.
पर्यावरणपूरक कंदिलांना पसंती
यंदा ग्राहकांचा कल टिकाऊ व पर्यावरणपूरक वस्तूंकडे अधिक दिसत आहे. कापडी, कागदी, बांबू तसेच पुनर्वापर करता येणाऱ्या साहित्यापासून तयार केलेल्या कंदिलांना नागरिकांचा चांगला प्रतिसाद मिळत आहे. स्थानिक महिला बचत गटांच्या माध्यमातून तयार झालेल्या आकाशकंदिलांनाही बाजारात मागणी आहे. त्यामुळे अनेक महिलांना रोजगार मिळाला असून, स्थानिक व्यावसायिक व बचत गटांच्या महिलांमध्ये समाधानाचे वातावरण आहे.
दरात १० ते १५ टक्के वाढ
कच्च्या मालाच्या किमती वाढल्याने आणि वाहतूक खर्च अधिक झाल्याने यंदा आकाशकंदिलांच्या दरात गेल्या वर्षाच्या तुलनेत १० ते १५ टक्क्यांनी वाढ झाली आहे. बाजारात हे कंदील १०० रुपयांपासून चार हजार रुपयांपर्यंत विविध आकार व प्रकारात उपलब्ध आहेत. तीन इंच ते सहा फुटांपर्यंतचे अष्टकोनी, पंचकोनी, डेरेदार तसेच नॅनो कंदील बाजारात मोठ्या प्रमाणात आले आहेत. दर वाढले असले तरी खरेदीच्या उत्साहात घट झालेली नाही.
यंदाच्या बाजारात धार्मिक व सांस्कृतिक संकल्पनांवर आधारित कंदिलांना विशेष पसंती मिळत आहे. छत्रपती शिवाजी महाराज, प्रभू श्रीराम, राधे-कृष्ण, गणपती बाप्पा, विठ्ठल-रुखमाई, खाटू श्याम महाराज, महादेव व श्री स्वामी समर्थ यांच्या प्रतिमा असलेले कंदील बाजारात दाखल झाले आहेत. कंदिलांच्या चारही बाजूंवरील या प्रतिमा रात्रीच्या रोषणाईत अधिक उठून दिसतात. पारंपरिक कागद व प्लास्टिकच्या पट्ट्यांव्यतिरिक्त यंदा वेतापासून बनवलेले चौकोनी, षटकोनी व डेरेदार आकारांचे कंदीलही बाजारात आले आहेत.
स्रोत: मूळ बातमी
Leave a Reply