भुसावळात सरदार वल्लभभाई पटेल यांच्या जयंतीनिमित्त शनिवारी (३१ ऑक्टोबर) सकाळी सकल लेवा समाजातर्फे शिस्तबद्ध व आदर्श शोभायात्रा काढण्यात आली. या मिरवणुकीत डीजेचा वापर टाळून पारंपरिक सनई-चौघडा व टाळ-मृदंगाचा गजर करण्यात आला. पारंपरिक वेशभूषेतील ही मिरवणूक पाहण्यासाठी लोक आवर्जून थांबत होते.
सकल लेवा समाज उत्सव समितीने आयोजित केलेल्या या शोभायात्रेत सहभागी होण्यासाठी जामनेर रोडवरील अष्टभुजा देवी मंदिराजवळ लोक जमू लागले होते. सजवलेली बैलगाडी सर्वांत पुढे होती. शहरासह तालुक्यातील विविध भागांतून वारकरी, कीर्तनकार व टाळकरी मोठ्या संख्येने आले होते. अभंग व हरीपाठ सादर करत टाळ-मृदंगाच्या तालावर मिरवणूक पुढे सरकत होती, त्यामुळे वातावरण भक्तिमय झाले होते.
संजीव देखावे ठरले आकर्षण
शोभायात्रेत संजीव देखावे लक्षवेधी ठरले. हर्षल बऱ्हाटे यांनी सरदार वल्लभभाई पटेल यांची, तर नीलिमा भोळे-झोपे यांनी बहिणाबाईंची वेशभूषा केली होती. केंद्रीय क्रीडा व युवक कल्याण राज्यमंत्री रक्षा खडसे यांच्या हस्ते श्रीफळ वाढवून शोभायात्रेची सुरुवात झाली. यावेळी माजी आमदार शिरीष चौधरी, प्रभारी नगराध्यक्षा शैलजा नारखेडे, माजी नगराध्यक्ष रमण भोळे, उमेश नेमाडे, प्रतिष्ठा महिला मंडळाच्या अध्यक्षा रजनी सावकारे, डॉ. केतकी पाटील, मंगला पाटील आदी उपस्थित होते.
शोभायात्रा जामनेर रोड, अग्रेसन चौक, विठ्ठल मंदिर वॉर्ड, बाजारपेठ पोलिस ठाणे, लोखंडी पुल, हंबर्डीकर बेकरी, वसंत टॉकीज, मुनिसिपल पार्क या मार्गे जाऊन सातारा भागातील सरदार वल्लभभाई पटेल यांच्या पुतळ्याजवळ संपन्न झाली.
विविध क्षेत्रांतील नागरिकांचा सहभाग
या शोभायात्रेत बेळी संस्थानचे गादीपती ह.भ.प. भरत महाराज, दिनकर महाराज, किशोर महाराज, गुरव महाराज, सुरेश महाराज, स्वामीनारायण पंथाचे मुक्ती स्वामी, गोपाल भगत आणि महानुभाव पंथाचे मानेकर बाबा यांची विशेष उपस्थिती होती. शहरातील डॉक्टर, वकील, अभियंता, शेतकरी व विविध व्यावसायिक डोक्यावर गांधी टोपी परिधान करून मोठ्या संख्येने मिरवणुकीत सहभागी झाले होते.
स्रोत: मूळ बातमी
Leave a Reply