धुळे शहरात मुंबई-आग्रा महामार्गावरील परिसरात सुरक्षेसाठी अंडरपाससह पथदिवे बसवले जावेत, अशी मागणी करण्यात आली आहे. शहर काँग्रेसचे कार्याध्यक्ष आणि माजी नगरसेवक मुजफ्फर हुसेन दोस्त महमद यांनी पालकमंत्री जयकुमार रावल यांना याबाबतचे निवेदन दिले.
राष्ट्रीय राजमार्ग प्राधिकरणाच्या अखत्यारीतील या महामार्गावर उम्मेसलमा मर्जीद किंवा सुलतानिया मदरसा आणि साहिल हॉटेल जवळील परिसरात ही सुविधा मागण्यात आली आहे. जनहितासह सुरक्षेचा हा महत्त्वाचा विषय असल्याने या पत्राची दखल घेऊन कामांना त्वरित मंजुरी देण्याची शिफारस पालकमंत्र्यांनी करावी, अशी विनंती निवेदनात करण्यात आली आहे.
वेगवान वाहतूक आणि अपघातांचा धोका
या ठिकाणी शाळकरी आणि महाविद्यालयीन विद्यार्थी, लहान मुले तसेच वाहनधारकांची मोठी ये-जा असते. वाहनांचा वेग जास्त असल्याने आणि रस्ता ओलांडण्यासाठी कोणतीही सुरक्षित व्यवस्था उपलब्ध नसल्यामुळे अपघातांचे प्रमाण वाढले आहे. स्थानिक नागरिकांच्या सुरक्षिततेसाठी या ठिकाणी पादचारी आणि वाहनांसाठी अंडरपास मंजूर करून त्याचे काम तातडीने सुरू करावे, अशी मागणी करण्यात आली आहे.
रात्रीच्या वेळी होणारे अपघात टाळण्यासाठी आणि सुरक्षेच्या दृष्टीने परिसरात हायमॅस्ट किंवा योग्य क्षमतेचे पथदिवे बसवण्याची मागणीही मुजफ्फर हुसेन यांनी केली आहे.
स्रोत: मूळ बातमी
Leave a Reply