कोल्हापूर जिल्ह्यात ऊसदराचा तोडगा न निघाल्याने ऊस आंदोलन अधिक तीव्र करण्याचा निर्णय स्वाभिमानी शेतकरी संघटनेने घेतला आहे. उसाला प्रतिटन ४५०० रुपये पहिली उचल मिळावी, या मागणीसाठी ३ नोव्हेंबरला किणी टोलनाक्यावर पुणे-बंगळूर राष्ट्रीय महामार्ग रोखून बेमुदत चक्काजाम करण्यात येणार आहे. माजी खासदार राजू शेट्टी यांनी शनिवारी पत्रकार परिषदेत हा इशारा दिला.
दरावरून मतभेद काय आहेत
जयसिंगपूर येथील ऊस परिषदेत १२.५ टक्क्यांच्या आसपास रिकव्हरी असणाऱ्या कारखान्यांनी प्रतिटन ४५०० रुपये पहिली उचल द्यावी, अशी मागणी करण्यात आली होती. या मागणीवर संघटना ठाम आहे. मात्र कारखानदार ३५०० आणि ३६०० रुपये दर देण्याचे म्हणत असतील, तर उसाचे एक कांडेही तोडू देणार नाही, असे शेट्टी यांनी सांगितले. कोल्हापूर जिल्ह्यात प्रतिटन ३४५० ते ३६५० रुपयांच्या आसपास सर्वांची एफआरपी बसते, हे मान्य नसल्याचेही त्यांनी म्हटले आहे. गेल्या वर्षी एफआरपी अधिक १०० रुपये दर घेण्यात आला होता. त्यावेळी साखरेचा दर प्रतिक्विंटल ३७०० रुपये गृहीत धरला होता, मात्र प्रत्यक्षात साखरेचा दर प्रतिकिलो ४० रुपये म्हणजे प्रतिक्विंटल ४ हजारांवर गेला. त्यामुळे कारखान्यांना ३०० रुपये अधिक मिळाले असून ते द्यायला हवे होते, असे शेट्टी म्हणाले.
दोन बैठका निष्फळ, आता रस्त्यावरचे आंदोलन
दरावर तोडगा काढण्यासाठी पालकमंत्री प्रकाश आबिटकर यांच्या प्रमुख उपस्थितीत जिल्ह्यातील साखर कारखानदार आणि विविध शेतकरी संघटनांच्या प्रतिनिधींच्या दोन बैठका झाल्या. मात्र दोन्ही बैठकांमध्ये कोणताही ठोस निर्णय होऊ शकला नाही. चर्चेतून मार्ग निघत नसल्याने आता रस्त्यावर उतरून आंदोलन करण्याशिवाय पर्याय नसल्याची भूमिका संघटनेने घेतली आहे. कर्नाटकचे मुख्यमंत्री तेथील शेतकऱ्यांना २४ तास वेळ देऊन त्यांच्या समस्या ऐकून घेत असल्याचा दावा करत शेट्टी यांनी आपल्या मुख्यमंत्र्यांकडे शेतकऱ्यांकडे लक्ष द्यायला वेळच नसल्याचा आरोप केला आहे.
स्रोत: मूळ बातमी
Leave a Reply