पेन्शनसंदर्भातील कामे करून देण्यासाठी कोणत्याही शासकीय अधिकारी किंवा कर्मचाऱ्याने लाचेची मागणी केल्यास घाबरून जाऊ नका. त्याऐवजी थेट लाचलुचपत प्रतिबंधक विभागाकडे तक्रार करावी, असा सल्ला विभागातर्फे ज्येष्ठ नागरिकांना देण्यात आला आहे. यासाठी टोल फ्री क्रमांक १०६४ वरही संपर्क साधता येईल.
दक्षता जनजागृती सप्ताहानिमित्त कार्यक्रम
२६ ऑक्टोबर ते १ नोव्हेंबरदरम्यान दक्षता जनजागृती सप्ताह साजरा करण्यात येत आहे. यानिमित्त लाचलुचपत प्रतिबंधक विभागाच्या छत्रपती संभाजीनगर कार्यालयातर्फे गुरुवारी निवृत्त नागरिकांसाठी जनजागृतीपर कार्यक्रम पार पडला. या कार्यक्रमात जिल्हा पेन्शनर्स असोसिएशनच्या पदाधिकाऱ्यांनी मोठा सहभाग नोंदवला.
निवृत्त कर्मचाऱ्यांना पेन्शन सुरू करणे, पेन्शनविषयक कागदपत्रांची पूर्तता करणे, प्रलंबित प्रकरणे तसेच अन्य शासकीय कामांसाठी विविध कार्यालयांशी संपर्क साधावा लागतो. अशा वेळी एखादा सरकारी अधिकारी किंवा कर्मचारी काम करून देण्यासाठी पैशांची मागणी करत असेल, तर त्याला बळी पडू नका, उलट लाचलुचपत प्रतिबंधक विभागाशी संपर्क साधा, असे आवाहन यावेळी करण्यात आले.
अधिकाऱ्यांचे मार्गदर्शन
या कार्यक्रमात लाचलुचपत प्रतिबंधक विभागाचे उपअधीक्षक प्रशांत पवार, पोलिस निरीक्षक धर्मराज बांगर, पोलिस निरीक्षक अमोल सोनवणे आणि पोलिस निरीक्षक प्रतिभा आबूज यांनी मार्गदर्शन केले. जिल्हा पेन्शनर्स असोसिएशनचे अध्यक्ष वसंत सबनीस, उपाध्यक्ष डॉ. अरविंद देशमुख, सचिव नामदेव घुगे, सहसचिव पी. बी. क्षीरसागर, सदस्य रजनी नागवंशी, प्रमिला कुंभारे, लकेकर आदी उपस्थित होते.
स्रोत: मूळ बातमी
Leave a Reply