जळगावात ‘नमामि आणि खामेमि’चा आध्यात्मिक अर्थ उलगडला

जळगावात चातुर्मासाच्या पवित्र काळात स्वाध्याय भवनाच्या प्रांगणात नियमित प्रवचनमाला सुरू आहे. या प्रवचनमालेत प्रखर वक्ते आणि तत्त्वचिंतक प्रमोद मुनी महाराज यांनी उपस्थितांना ‘नमामि आणि खामेमि’ या दोन आध्यात्मिक शब्दांचा अर्थ समजावून सांगितला.

प्रमोद मुनी महाराज म्हणाले की, आत्मशुद्धी, अहंकाराचा नाश आणि करुणेची भावना व्यक्त करणारे हे दोन महत्त्वाचे शब्द आहेत. ‘नमामि’ म्हणजे विनम्रतेने नमन करणे किंवा नतमस्तक होण्याचा समर्पित भाव होय. एखादी व्यक्ती जेव्हा कोणाला ‘नमामि’ म्हणते, तेव्हा ती आपल्या अंतर्मनातील अहंकाराचा त्याग करते. जीवनात विनयशीलता आणि नम्रता असणे माणसाला सामाजिक, कौटुंबिक तसेच व्यावहारिक जीवनात सन्मान मिळवून देते.

पाल परिसरात पर्यटकांचा ओढा

रावेर तालुक्यातील पाल येथे सातपुड्याच्या डोंगररांगांमध्ये गारबर्डी धरणाच्या काठावर वन विभागाने पर्यटकांसाठी कुटी आणि वन्यप्राण्यांना न्याहाळण्यासाठी तसेच पक्षी निरीक्षणासाठी उंच मनोरे उभारले आहेत. त्याला चांगला प्रतिसाद मिळत असून वृक्ष, वन्यजीव अभ्यासक, पर्यावरणप्रेमी आणि पर्यटक या भागात येत आहेत. जिल्ह्यातील पाल इको टुरिझमला गती देण्याचे काम वन्यजीव वन विभागाने हाती घेतले असून पर्यटकांना जंगल सफारीचा आनंद घेता येणार आहे.

काव्यसंग्रह प्रकाशन आणि सत्संग

ज्येष्ठ कवी भगवान भटकर यांच्या ‘कवितेच्या वळणवाटा’ या मराठी काव्यसंग्रहासह ‘तुकबंदी’ या हिंदी-उर्दू काव्यसंग्रहाचा प्रकाशन सोहळा रविवारी (ता. १) आयोजित करण्यात आला आहे. जिल्हाधिकारी कार्यालय परिसरातील अल्पबचत भवन सभागृहात सकाळी अकरा वाजता हा कार्यक्रम होईल. मराठी काव्यसंग्रहाचे प्रकाशन साहित्यिक आणि कवी प्रा. वा. ना. आंधळे यांच्या हस्ते, तर हिंदी-उर्दू काव्यसंग्रहाचे प्रकाशन कवयित्री बहिणाबाई चौधरी उत्तर महाराष्ट्र विद्यापीठाचे माजी उपकुलसचिव डॉ. रफिक काझी ‘राही’ यांच्या हस्ते होईल. मु. जे. महाविद्यालयाचे प्रा. देवेंद्र इंगळे या सोहळ्याचे अध्यक्ष असतील, तर अथर्व प्रकाशनचे संचालक युवराज माळी प्रमुख उपस्थितीत राहतील.

अखिल भारतीय श्री स्वामी समर्थ गुरुपीठाचे चंद्रकांत मोरे हे १ ते ३ नोव्हेंबरदरम्यान जिल्ह्याच्या दौऱ्यावर येत आहेत. या तीन दिवसांत जिल्ह्यातील १७ केंद्रांवर त्यांचा सत्संग होणार आहे. रविवारी (ता. १) सकाळी १० वाजता चाळीसगाव येथील हिरापूर रोड केंद्राला भेट देऊन त्यांच्या दौऱ्याला प्रारंभ होईल. दुसऱ्या दिवशी जळगाव शहरातील १६ सेवा केंद्रांना भेटी देत ते भाविकांशी संवाद साधतील आणि सायंकाळी ७ वाजता प्रताप नगर केंद्रावर कार्यक्रम होईल.

स्रोत: मूळ बातमी