जिल्ह्यातील विविध राष्ट्रीय व राज्यस्तरीय आरोग्य कार्यक्रमांची प्रभावी अंमलबजावणी करून प्रलंबित कामे दिलेल्या मुदतीत पूर्ण करावीत, असे निर्देश जिल्हा परिषदेच्या मुख्य कार्यकारी अधिकारी करिश्मा नायर यांनी दिले आहेत. आरोग्य संस्थांमधील सेवा अधिक गुणवत्तापूर्ण, पारदर्शक आणि लोकाभिमुख करण्यावर भर द्यावा, असेही त्यांनी सांगितले.
जिल्हा परिषदेच्या छत्रपती शाहू महाराज सभागृहात आरोग्य विभागाची जिल्हास्तरीय आढावा बैठक झाली. या बैठकीत आरोग्य योजनांची तालुकानिहाय प्रगती, उद्दिष्टपूर्ती आणि प्रलंबित कामांचा सविस्तर आढावा घेण्यात आला. यावेळी महिला बालविकास विभागाचे जिल्हा कार्यक्रम अधिकारी हेमंतराव भदाणे, प्रभारी जिल्हा आरोग्य अधिकारी डॉ. रमेश धापते, प्रभारी अतिरिक्त जिल्हा आरोग्य अधिकारी डॉ. दीपक वाणी, प्रभारी जिल्हा शल्यचिकित्सक डॉ. विवेक सावटे, डॉ. दीपक जाधव, जिल्हा कार्यक्रम व्यवस्थापक डॉ. पंकज शिंपी आदी उपस्थित होते.
तालुकानिहाय प्रगतीचा आढावा
या बैठकीत आरोग्य सेवा आणि उपस्थितीबाबत कडक निर्देश देण्यात आले. माता, बालके आणि सर्वसामान्य नागरिकांपर्यंत शासनाच्या आरोग्य योजनांचा लाभ प्रभावीपणे पोहोचवण्यासाठी आरोग्य विभाग आणि महिला व बालविकास विभागाने समन्वयाने काम करावे, अशा सूचना देण्यात आल्या.
कोणत्या कार्यक्रमांचा आढावा
बैठकीत असंसर्गजन्य रोग नियंत्रण कार्यक्रम, एचपीव्ही लसीकरण, १०० दिवस अभियान, ‘तिशीचा पल्ला – तपासणी अन् सल्ला’, ‘माझं गाव – आरोग्य संपन्न गाव’ अभियान, आयुष्मान कार्ड आणि प्रधानमंत्री जनआरोग्य योजना यासह विविध आरोग्य कार्यक्रमांच्या अंमलबजावणीचा आढावा घेण्यात आला.
स्रोत: मूळ बातमी
Leave a Reply